जनकपुरधाम, १९ असार । मधेश प्रदेशको स्वास्थ्य आपूर्ति व्यवस्थापन केन्द्रमा देखिएको विवादमा उच्च अदालत जनकपुरले हस्तक्षेप गर्दै हालै हटाइएका निर्देशक डा. सुनिल प्रसाद कुशवाहाको पक्षमा अल्पकालीन आदेश जारी गरेको छ ।

असार १२ गते मधेश प्रदेश सरकारले डा. कुशवाहालाई हटाएर वरिष्ठ कन्सल्टेन्ट मेडिकल जनरलिष्ट डा. राजीवकुमार झालाई आर्थिक तथा प्रशासनिक अधिकारसहित निमित्त निर्देशक बनाएको थियो । यो निर्णय स्वास्थ्य मन्त्री शत्रुधन प्रसाद सिंहमाथि ‘मेडिकल माफिया’को प्रभाव देखाउँदै गरिएको भन्दै आलोचना भइरहेको छ ।

डा. कुशवाहाको तर्फबाट बिहीबार उच्च अदालत जनकपुरमा परेको रिटमा सुनुवाइ गर्दै न्यायाधीश राजुराम सिलवालको इजलासले असार २७ गतेसम्म उक्त निर्णय कार्यान्वयन नगर्न आदेश दिएको हो । अदालतले मधेश प्रदेश सरकारका मुख्य न्यायाधीवक्तामार्फत विपक्षी बनाइएका पाँच जना प्रतिवादीसँग १५ दिनभित्र लिखित जवाफ मागेको छ ।

स्वास्थ्य मन्त्रालयबाट डा. झालाई ल्याउने निर्णय पछाडि करिब २२ करोड रुपैयाँ बराबरको औषधी तथा सामग्री आपूर्ति गर्न खोज्ने समूहको चलखेल रहेको आरोप लागेको छ । स्रोतका अनुसार यी गतिविधिमा विवादित मेडिकल कारोबारी विशाल पण्डितको संलग्नता छ । उनीविरुद्ध अख्तियारमा कैयौं मुद्दा दर्ता भइसकेका छन् ।

सूचना अनुसार डा. कुशवाहाले प्रक्रिया अपारदर्शी रहेको भन्दै ठेक्काका प्रस्तावहरू अस्वीकार गरेपछि उनीमाथि दबाब र हटाउने प्रयास सुरु गरिएको हो । यसैबीच, मुख्यमन्त्री कार्यालयमै कुशवाहालाई ज्यान मार्ने धम्कीसमेत दिएको विषय पनि सार्वजनिक भएको छ ।

अदालतको आदेशले असार मसान्तमा चेक काटेर बजेट बाँड्ने तयारीमा रहेका समूहको योजना तत्कालका लागि असफल बनेको छ । अब असार २७ मा अदालतमा हुने छलफलपछि आदेशलाई निरन्तरता दिने या नदिने टुंगो लाग्नेछ ।