जनकपुरधाम, १९ असार । नेपाल प्रिमियर लिग (एनपिएल) को दोस्रो संस्करणका लागि साबिक विजेता जनकपुर बोल्ट्सले टिम पुनर्संरचना गर्दै सात खेलाडीलाई रिटेन र पाँच खेलाडीलाई रिलिज गरेको छ ।

क्लबले सामाजिक सञ्जालमार्फत जानकारी दिँदै आगामी सिजनका लागि मार्की खेलाडीका रूपमा विकेटकिपर–व्याट्सम्यान आसिफ शेखलाई कायम राखेको जनाएको हो ।

उनका साथै अनिल साह, ललितनारायण राजवंशी, शुभ कसांकार, तुलबहादुर थापा, किशोर महतो र रुपेश सिंह पनि रिटेन्ड सूचीमा परेका छन् ।

यसैबीच, क्लबले आकाश त्रिपाठी, विशाल शुस्लिङ, हेमन्त धामी, अरनिको यादव र शेर मल्ललाई रिलिज गर्दै टिमको बाँकी संरचना अक्सनपछि टुंग्याउने तयारी गरेको छ ।

गत संस्करणमा सुदूरपश्चिम रोयल्सलाई ५ विकेटले पराजित गर्दै उपाधि उचालेको जनकपुर बोल्ट्सले यस सिजन पनि उपाधि रक्षा गर्ने लक्ष्यसहित तयारी थालेको जनाएको छ ।

यसैक्रममा, नेपाल क्रिकेट संघ (क्यान) ले एनपिएलको दोस्रो संस्करणका लागि आगामी साउन÷अगस्टमा अक्सन आयोजना गर्ने तयारी गरिरहेको छ । अक्सनपछि क्लबहरूले रिलिज गरिएका खेलाडीको स्थानमा नयाँ अनुबन्ध गर्न सक्नेछन् ।

जनकपुर बोल्ट्सका प्रशासकीय स्रोतका अनुसार टिमलाई थप मजबुत बनाउने रणनीतिअनुसार फेरबदल गरिएको हो । अघिल्लो संस्करणमा उत्कृष्ट प्रदर्शन गरेका खेलाडीहरूलाई टिममा कायम राखेर निरन्तरतामा जोड दिइएको क्लबको भनाइ छ ।