जनकपुरधाम, १६ असार । राजर्षि जनक विश्वविद्यालयको स्थायी भवन निर्माण प्रक्रिया तत्काल अघि बढाउन माग गर्दै नेपाली काँग्रेस धनुषाका सभापति योगेन्द्र पंजियारको नेतृत्वमा एक प्रतिनिधिमण्डलले विश्वविद्यालयका उपकुलपतिलाई भेटी औपचारिक स्मरणपत्र बुझाएको छ ।

प्रतिनिधिमण्डलसँगको भेटमा उपकुलपतिले प्राविधिक र प्रशासनिक सबै प्रक्रिया पूरा भइसके पनि राजनीतिक हस्तक्षेपका कारण भवन निर्माण अघि नबढेको स्वीकार गरेका छन् । उनले कुन नेताको दबाब रहेको भन्ने खुलाउन चाहेनन् तर भने, ‘हामीमाथि सकारात्मक दबाब आवश्यक छ । यसले काम गर्न ऊर्जा दिन्छ ।’

वि.सं. २०५३ मा नेता विमलेन्द्र निधिले अघि सारेको विश्वविद्यालय अवधारणालाई तत्कालीन जिल्ला विकास समिति सभापति रामसरोज यादवको अध्यक्षतामा परिषद् बैठकले अनुमोदन गरेको थियो । त्यसबेला धनुषाका सबै गाविसले १ लाख र महोत्तरीका स्थानीय निकायले ५० हजार रुपैयाँ सहयोग गरेका थिए ।

हाल नगराइन नगरपालिका–४ स्थित मणियारी चौरीमा विश्वविद्यालयलाई १३ बिघा जग्गा प्रदान गरिएको छ । तर, तीन दशक बित्दासमेत स्थायी संरचना निर्माण नहुनुमा स्थानीयवासीबीच निराशा फैलिएको जनाइएको छ ।

प्रतिनिधिमण्डलले शिक्षा जस्तो पवित्र क्षेत्रमा राजनीतिक विवादको प्रभाव बढ्दै गएकोप्रति गम्भीर आपत्ति जनाउँदै विश्वविद्यालय प्रशासन र प्रदेश सरकारलाई तत्काल भवन निर्माण कार्य सुरु गर्न आग्रह गरेको छ । स्मरणपत्रमार्फत दीर्घकालीन स्थायित्वका लागि आवश्यक निर्णय लिन पनि जोड दिइएको छ ।

प्रतिनिधिमण्डलमा पूर्व प्रदेशमन्त्री तथा सांसद रामसरोज यादव, जनकपुरधामका मेयर मनोज कुमार साह, नगराइन नगरपालिकाका मेयर विनय यादव, काँग्रेसका युवा नेता राम पल्टन साह, प्रवेश चौधरी, क्षेत्रीय सभापति छेदी राउत, रामचन्द्र पंजियार, महिला नेतृ निलम कर्ण, अनिता श्रीवास्तव, प्रजातन्त्र सेनानी संघका प्रमोद कुमार श्रीवास्तव, विद्यार्थी नेता सुजित यादवसहित स्थानीय जनप्रतिनिधि तथा नेताहरूको उपस्थिति थियो ।

नेताहरूले विश्वविद्यालय आफ्नै भवन नहुँदासम्म शिक्षाको गुणस्तरमा दीर्घकालीन असर पर्ने भन्दै प्रशासनलाई तत्काल कदम चाल्न आह्वान गरेका छन् ।