जनकपुरधाम, १४ असार । जनकपुरधाममा सम्पन्न मुख्यमन्त्री अन्तर–प्रदेश राष्ट्रिय कबड्डी प्रतियोगिता–२०८२ को उपाधि सुदूरपश्चिम प्रदेशले जितेको छ ।

आयोजक मधेश प्रदेशलाई ३६–३७ को झिनो अन्तरले पराजित गर्दै सुदूरपश्चिमले रोमाञ्चक फाइनल खेलमा जित हात पारेको हो ।

जनकपुरधामस्थित अवध मिथिला सांस्कृतिक धर्मशालाको सभाहलमा शनिबार भएको प्रतिस्पर्धात्मक फाइनल खेलमा दुबै टोलीले अन्तिम क्षणसम्म उत्कृष्ट प्रदर्शन गरे पनि सुदूरपश्चिमले १ अंकको अग्रता कायम राख्दै उपाधि उचाल्यो । खेलभरि दुवै प्रदेशबीच कडा प्रतिस्पर्धा देखिएको थियो ।

लुम्बिनी र बागमती प्रदेश भने प्रतियोगिताको तृतीय स्थानमा समान अङ्कसहित रहन पुगे । उनीहरूले १५ हजार रुपैयाँ नगद, कप र कास्य पदक प्राप्त गरे ।

विजेता सुदूरपश्चिमले २५ हजार रुपैयाँ नगद, उपाधि ट्रफी र स्वर्ण पदक प्राप्त गर्यो भने दोस्रो स्थानमा रहन पुगेको मधेश प्रदेशले २० हजार नगद, ट्रफी र रजत पदक प्राप्त गर्यो ।

प्रतियोगिता असार १२ गतेदेखि सुरु भई तीन दिनसम्म चल्यो । प्रतियोगिता मधेश प्रदेश सरकारअन्तर्गतको खेलकुद तथा समाज कल्याण मन्त्रालयको आयोजनामा सम्पन्न भएको हो ।