काठमाडौं, १३ असार । राष्ट्रिय परीक्षा बोर्डले शुक्रबार साँझ सार्वजनिक गरेको माध्यमिक शिक्षा परीक्षा (एसईई) २०८१ को नतिजामा ६१.८१ प्रतिशत विद्यार्थी ग्रेडेड भएका छन् । यो अघिल्लो वर्षको तुलनामा करिब १४ प्रतिशतले उल्लेखनीय सुधार हो ।

नतिजा अनुसार नियमित परीक्षामा सहभागी ४ लाख ३८ हजार ८९६ जना विद्यार्थीमध्ये २ लाख ७१ हजार २९९ जनाले ग्रेड हासिल गर्न सफल भएका छन् । गत वर्ष मात्र ४७.८६ प्रतिशत विद्यार्थीले ग्रेड प्राप्त गरेका थिए । यसपटकको परिणाममा आएको सुधारलाई शिक्षा क्षेत्र सुधारतर्फको सकारात्मक संकेतका रूपमा लिइएको छ ।

बोर्डका अनुसार ४८ हजार १७७ जना परीक्षार्थीले ३.६ देखि ४.० जिपिए ल्याएका छन् । यो अघिल्लो वर्षको तुलनामा उल्लेखनीय हो । त्यसैगरी ३.२ देखि ३.६ जिपिए ल्याउने ८१ हजार ३८५, २.८ देखि ३.२ जिपिए ल्याउने ८९ हजार १२४, २.४ देखि २.८ ल्याउने ४८ हजार ४७९, २.० देखि २.४ जिपिए ल्याउने ४ हजार १२६ र १.६ देखि २.० ल्याउने ८ जना विद्यार्थी रहेको बोर्डले जनाएको छ ।

हालसम्मको सुधारका बाबजुद १ लाख ६७ हजार ५९७ परीक्षार्थी नन–ग्रेडेड अर्थात् फेल भएका छन् । बोर्डले उनीहरूलाई पुनः अवसरस्वरूप साउन २९ गतेबाट सञ्चालन हुनेगरी पूरक परीक्षा दिने व्यवस्था गरेको छ ।

यस वर्ष पनि गणित विषयमै सबैभन्दा धेरै विद्यार्थी नन–ग्रेडेड भएका छन् । बोर्डका अध्यक्ष डा. महाश्रम शर्माका अनुसार गणित विषयमा मात्र १ लाख २८ हजार २१५ विद्यार्थी फेल भएका छन् ।

‘समग्रतामा नतिजा सुधार भए पनि गणित विषयमा ननग्रेडेड विद्यार्थीको संख्या चिन्ताजनक छ,’ अध्यक्ष शर्माले भने ।

गणितपछि सबैभन्दा बढी नन–ग्रेडेड विद्यार्थी अंग्रेजी विषयमा ८० हजार ६७२, विज्ञान तथा प्रविधिमा ७९ हजार २७१, नेपाली विषयमा ५४ हजार ७३५ र सामाजिक विषयमा ५३ हजार १८६ रहेका छन् ।

उत्तीर्ण हुने विद्यार्थीको संख्या प्रदेशअनुसार हेर्दा बागमती प्रदेश सबैभन्दा अगाडि देखिएको छ । यस प्रदेशबाट १ लाख १९ हजार ५१७ विद्यार्थीले परीक्षा पास गरेका छन् ।

त्यसपछि लुम्बिनीबाट ९७ हजार ६८७, सुदूरपश्चिमबाट ५९ हजार ८०४, मधेश प्रदेशबाट ५९ हजार ७४९, गण्डकीबाट ४७ हजार ८४९, कोशीबाट ४७ हजार ८३५ र कर्णाली प्रदेशबाट ४६ हजार ४५५ जना विद्यार्थी उत्तीर्ण भएका छन् ।

नियमविपरीत कार्यका कारण १२६ परीक्षार्थीको परीक्षा रद्द गरिएको बोर्डले जानकारी दिएको छ । यसबारे विवरण गोप्य राखिएको भए पनि परीक्षा केन्द्रमा अनुशासनहीनता, चोरी वा नक्कली परिचयको आधारमा परीक्षा दिएको आरोपमा उनीहरूलाई कारबाही गरिएको अनुमान गरिएको छ ।

गत वर्षको कमजोर नतिजापछि प्रधानमन्त्री, शिक्षा मन्त्रालय र बोर्डकै तहबाट सुधारका लागि विशेष निर्देशन र योजना ल्याइएको थियो । यसपटकको नतिजामा देखिएको सुधारलाई सोही प्रयासको प्रारम्भिक सफलता मानिएको छ ।

शिक्षाविद्हरूले पनि नतिजामा आएको सुधार सकारात्मक भए पनि विषयगत कमजोरी, विशेषगरी गणित र अंग्रेजी, सुधारका लागि गहिरो विश्लेषण र दीर्घकालीन रणनीति आवश्यक रहेको बताएका छन् ।