पर्सा, १३ असार । पर्साको वीरगंज महानगरपालिका–२८ स्थित बगहीमा शुक्रबार दिउँसो भएको ट्याक्टर दुर्घटनामा दुई किशोरको ज्यान गएको छ भने एक जना गम्भीर घाइते भएका छन् ।

जिल्ला प्रहरी कार्यालय पर्साका अनुसार माटो बोकेको ट्याक्टर अनियन्त्रित भई सडकबाट करिब १५ फिट तल खस्दा १६ वर्षीय आकाश पटेल र १७ वर्षीय गोलु पटेलको घटनास्थलमै ज्यान गएको हो ।

दुर्घटनाको समयमा ट्याक्टर भेडाहा खोलाबाट माटो बोकेर बगहीतर्फ जाँदै थियो । अत्यधिक गतिमा रहेको ट्याक्टरमा नम्बर प्लेट समेत नरहेको पर्साका प्रहरी नायब उपरीक्षक सुवास भट्टले जानकारी दिए । ‘अनियन्त्रित ट्याक्टर सडकबाट तल खस्दा दुई किशोरको ज्यान गएको छ । ट्याक्टरमा कुनै दर्ता नम्बर थिएन,’ डीएसपी भट्टले भने ।

दुर्घटनामा घाइते भएका जयकुमार मण्डलको वीरगंजस्थित नारायणी अस्पतालमा उपचार भइरहेको छ । चिकित्सकका अनुसार उनको अवस्था गम्भीर छ ।

र्दुघटनाको कारण र ट्याक्टरको स्वामित्वबारे अनुसन्धान जारी रहेको प्रहरीले जनाएको छ । प्रारम्भिक अनुसन्धानअनुसार चालकको लापरवाही र सवारी साधनको अव्यवस्थित अवस्था दुर्घटनाको मुख्य कारण हुनसक्ने अनुमान गरिएको छ ।