जनकपुरधाममा पहिलोपटक ‘उपमेयर कप’ महिला कबड्डी प्रतियोगिता सुरु

जनकपुरधाम, ११ असार । महिला सशक्तिकरण र विद्यालयस्तरमै खेलकुदको प्रतिस्पर्धात्मक वातावरण निर्माण गर्ने उद्देश्यसहित जनकपुरधाम उपमहानगरपालिकाले पहिलोपटक ’उपमेयर कप महिला कबड्डी प्रतियोगिता’ आयोजना गरेको छ ।
गोगल प्रसाद माध्यमिक विद्यालय, बसहियाको प्रांगणमा आयोजना गरिएको प्रतियोगिताको उद्घाटन बुधबार सम्पन्न भयो । प्रतियोगितामा उपमहानगर क्षेत्रका १० सामुदायिक माध्यमिक विद्यालयका छात्राहरूको सहभागिता रहेको छ ।
प्रत्येक विद्यालयबाट १० जना छात्रा खेलाडी र १ जना खेल शिक्षकसहितको टोली प्रतियोगितामा सहभागी भएको उपप्रमुख किशोरी साहले जानकारी दिए ।
उद्घाटन समारोहमा बोल्दै नगरप्रमुख मनोज कुमार साहले यस्ता प्रतियोगिताले महिला तथा किशोरीहरूमा आत्मविश्वास, नेतृत्व क्षमता र सहभागिता भावना बढाउने विश्वास व्यक्त गरे । उनले यस्ता कार्यक्रमहरूलाई निरन्तरता दिने प्रतिबद्धता पनि जनाए ।
प्रतियोगितामा प्रथम, द्वितीय र तृतीय स्थान हासिल गर्ने टोलीहरूलाई पुरस्कार प्रदान गरिनेछ ।
स्थानिय तहको पहलमा पहिलोपटक विद्यालयस्तरीय छात्रा कबड्डी प्रतियोगिता आयोजना हुनु उदाहरणीय पहल भएको सहभागी शिक्षक, अभिभावक तथा स्थानीयवासीले बताएका छन् ।

