जनकपुरधाम, ११ असार । मधेश प्रदेश सरकारले ५० लाख रुपैयाँ खर्च गर्दै मुख्यमन्त्री अन्तर–प्रदेश कबड्डी प्रतियोगिताको आयोजना गर्न लागेको छ । तीन दिनसम्म सञ्चालन हुने उक्त प्रतियोगितामा सातवटै प्रदेशका कबड्डी टिमहरू सहभागी हुँदैछन् ।

मधेश खेलकुद परिषद्का सदस्य सचिव शिवजी प्रसाद कानुका अनुसार प्रत्येक प्रदेशबाट १२ जना खेलाडीको सहभागिता हुनेछ । कुल ८४ जना खेलाडी प्रतियोगितामा भाग लिनेछन् । उनले मधेशको भौगोलिक र सांस्कृतिक पृष्ठभूमि झल्काउने यो प्रतियोगिता ठूलो अवसर हुने विश्वास व्यक्त गरे ।

यद्यपि, प्रतियोगिताको पुरस्कार राशी अत्यन्त न्यून रहेको पाइन्छ । प्रथम स्थानलाई २५ हजार, दोस्रो स्थानलाई २० हजार र तेस्रो स्थानलाई १५ हजार पुरस्कार प्रदान गरिने छ । कानुले यसबारे भने, ‘यो कार्यविधिको सीमा हो । पुरस्कार राशी हाम्रो इच्छाअनुसार नभई नियमले निर्धारण गरेको हो ।’

प्रतियोगिता आयोजनाको कुल बजेट ५० लाख रुपैयाँ रहेको भए पनि पुरस्कार राशी र खेलाडीको सम्मानमा असन्तुलन देखिएको बताइएको छ । कार्यविधिअनुसार खेलाडीहरूलाई पाँच दिनका लागि दैनिक १२ सयदेखि १६ सय रुपैयाँसम्म भत्ता दिइने व्यवस्था गरिएको छ । ८४ खेलाडीको भत्तामा जम्मा ६ लाख ७२ हजार रुपैयाँ खर्च हुनेछ ।

यसो गर्दा पनि प्रतियोगितामा ८४ खेलाडीबाहेक १४ जना प्रशिक्षक र व्यवस्थापक, ५२ जना निर्णायक, अफिसियल र स्वयंसेवकको सहभागिता रहनेछ । खेलकुद प्रवद्र्धनका लागि प्रदेश सरकारले बजेट निकालेको भए पनि वास्तविक पुरस्कार र सम्मानको व्यवस्था भने सीमित रहेको देखिन्छ ।