रौतहट, ९ असार । पूर्व–पश्चिम राजमार्ग अन्तर्गत रौतहटको चन्द्रपुर नगरपालिका–२ मा सोमबार बिहान भएको बस दुर्घटनामा १० जना यात्रु घाइते भएका छन् । घाइतेमध्ये ७ जना भारतीय नागरिक रहेको जिल्ला प्रहरी कार्यालय रौतहटले जनाएको छ ।

काठमाडौंबाट महोत्तरीतर्फ गइरहेको बागमती प्रदेश ०१–००६ ख ५२१६ नम्बरको यात्रुबाहक बस बिहान साढे ४ बजे अनियन्त्रित भई सडकबाट करिब ७ फिट तल खसेर दुर्घटना भएको हो ।

जिल्ला प्रहरी कार्यालय रौतहटका प्रवक्ता डिएसपी दीपक रायका अनुसार बसमा २५ जना यात्रु सवार थिए । तीमध्ये १० जना यात्रु घाइते भएका छन् ।

घाइतेहरूमा भारत सितामढीकी ४४ वर्षीया रेखा देवी, २२ वर्षीया जहदेवी झा, ११ वर्षीय बिसु कुमार पटेल, दरभंगाका २६ वर्षीय मोहमद अमज, मोहमद अकिल, ३८ वर्षीया नरगिस खातुन र २ वर्षीय बालक आयस प्रतिक रहेका छन् ।

त्यस्तै, नेपालतर्फका यात्रुहरूमा धनुषा क्षिरेश्वरनाथ–१ का २३ वर्षीय अनुष्का निगम, जनकपुरधामका ३५ वर्षीया सन्तोषी ठाकुर र जलेश्वर–४ की ४३ वर्षीया पुनम ठाकुर पनि घाइते भएको प्रहरीले जनाएको छ ।

घाइतेहरूको चन्द्रनिगाहपुरस्थित विभिन्न अस्पतालहरूमा उपचार भइरहेको छ । प्रारम्भिक अनुसन्धान अनुसार बस अनियन्त्रित भई दुर्घटना भएको अनुमान गरिएको छ ।