जनकपुरधाम, ९ असार । धनुषा जिल्लाको क्षिरेश्वरनाथ नगरपालिकाले पूर्णखोप सुनिश्चितता घोषणा गर्दै स्थानीय तहको स्वास्थ्य सुरक्षाको क्षेत्रमा महत्वपूर्ण सफलता हासिल गरेको छ ।

नगरपालिकाले सरकारद्वारा तोकिएका सबै आवश्यक खोपहरू लक्षित समूहलाई पूर्ण रूपमा प्रदान गरी यो ऐतिहासिक घोषणा गरेको हो ।

खोप अभियानलाई व्यवस्थित, पहुँचयोग्य र प्रभावकारी बनाउने उद्देश्यले नगरपालिकाले जनचेतना अभिवृद्धि, स्वास्थ्यकर्मीको सक्रियता र नियमित अनुगमनलाई प्राथमिकता दिएको थियो ।

नगरका सबै वडामा बालबालिका, गर्भवती महिला, वृद्धवृद्धा लगायत सबै लक्षित समूहलाई तालिकाअनुसारको खोप सेवा उपलब्ध गराइएको स्वास्थ्य शाखाले जनाएको छ ।

नगर प्रमुख सुखदेव यादवले यस घोषणालाई नगरवासीको समग्र स्वास्थ्य सुरक्षाको दिशामा महत्वपूर्ण कदम भएको बताएका छन् । ‘खोपको पहुँच सुनिश्चित गर्नु मात्र नभई नागरिकको जीवन र भविष्य सुरक्षित गर्नु हाम्रो उद्देश्य हो,’ यादवले भने ।

नगरपालिकाले खोप प्रभावकारिता, भण्डारण व्यवस्थापन र पुनः खोप कार्यक्रमलाई निरन्तरता दिने तयारी समेत गरिरहेको छ ।