सप्तरी, ८ असार । सप्तरीको हनुमाननगर कंकालिनी नगरपालिका–१ अन्तर्गत कोशी बाँधको भित्री सडकखण्डमा आइतबार बिहान भएको मोटरसाइकल दुर्घटनामा दुई जनाको ज्यान गएको छ भने एक जना गम्भीर घाइते भएका छन् ।

इलाका प्रहरी कार्यालय कञ्चनपुरका अनुसार तीव्र गतिमा रहेका दुई मोटरसाइकलहरू एकआपसमा ठोक्किँदा भएको उक्त दुर्घटनामा शम्भुनाथ नगरपालिका–११ राजपुरका १९ वर्षीय आशाराम मण्डल र कञ्चनरुप नगरपालिका–१ बैरवाका ३४ वर्षीय ओमप्रकाश पंजियारको ज्यान गएको हो ।

स १० प ५६२ नम्बरको मोटरसाइकल कंकालिनी मन्दिरबाट भलवातर्फ जाँदै गर्दा विपरीत दिशाबाट आइरहेको बा ५५ प ६६३९ नम्बरको मोटरसाइकलसँग बिहान करिब ५ः५० बजे ठोक्किएको थियो । मण्डलको गजेन्द्रनारायण सिंह अस्पताल राजविराजमा उपचारको क्रममा बिहान ७ः३० बजे र पंजियारको विराटनगरस्थित न्यूरो अस्पतालमा बिहान ११ बजे मृत्यु भएको प्रहरीले जानकारी दिएको छ ।

दुर्घटनामा स १० प ५६२ नम्बरको मोटरसाइकलमा पछाडि सवार ३० वर्षीय सुभाष महतो घाइते भएका छन् । खुट्टा र शरीरका विभिन्न भागमा चोट लागेका उनलाई विराटनगरमा उपचारपछि डिस्चार्ज गरिएको इलाका प्रहरी कार्यालय कञ्चनपुरका प्रमुख प्रहरी नायब उपरीक्षक माधव प्रसाद काफ्लेले बताए ।

प्रहरीका अनुसार दुवै मृतकको शव पोस्टमार्टमपछि परिवारको जिम्मा लगाइएको छ भने दुर्घटनामा संलग्न दुवै मोटरसाइकल इलाका प्रहरी कार्यालय भारदहको नियन्त्रणमा राखिएको छ । घटनाबारे थप अनुसन्धान जारी रहेको जनाइएको छ ।