महोत्तरी, ८ असार । ‘सुरक्षित मातृत्व, सशक्त समाज’ भन्ने नारालाई व्यवहारमा उतार्ने उद्देश्यसहित बर्दिवासस्थित शुभस्वस्तिक अस्पतालले ‘आमा सुरक्षा कार्यक्रम’को शुरुवात गरेको छ ।

बर्दिवास नगरपालिकाका नगरप्रमुख प्रह्लाद कुमार क्षेत्रीले औपचारिक रूपमा कार्यक्रम उद्घाटन गरे । मातृत्व स्वास्थ्यप्रति राज्य र समाज दुवैको जिम्मेवारी आवश्यक रहेको उल्लेख गर्दै नगरप्रमुख क्षेत्रीले भने, ‘नेपालमा अझै पनि मातृ मृत्युदर उच्च छ । सुरक्षित सुत्केरी सेवा सर्वसुलभ बनाउनु आजको आवश्यकता हो ।’

‘आमा सुरक्षा कार्यक्रम’ले सुत्केरी महिलाहरूलाई डेलिभरी सेवा, बेड चार्ज लगायतका महत्वपूर्ण स्वास्थ्य सेवा निःशुल्क प्रदान गर्दैछ । यसबाहेक महिलाहरूलाई अस्पतालसम्म आउन–जानका लागि सवारी खर्च समेत प्रदान गरिनेछ । सो खर्च महिलाको बासस्थानअनुसार फरक हुने अस्पताल प्रशासनले जनाएको छ ।

यद्यपि, सर्जरीका क्रममा आवश्यक पर्ने क्याथेटर, सर्जिकल ब्लेड, सिलाउने धागो जस्ता केही सामग्री बिरामी पक्षले आफैं जोहो गर्नुपर्ने प्रावधान कायम गरिएको छ ।

गौशाला नगरपालिका–१ की पुनिता पासवानले भनिन्, ‘पहिले धेरै खर्च लाग्छ कि भन्ने डर थियो । तर, यहाँ निःशुल्क सेवा पाइयो । सबै सुविधा सहज छ ।’ त्यस्तै, क्षिरेश्वर नगरपालिका–५ की पूजा राईले भनिन्, ‘सुत्केरी सेवा मात्र होइन, सवारी खर्चसमेत पाउनु हामीजस्ता परिवारका लागि ठूलो राहत हो ।’

शुभस्वस्तिक अस्पतालका प्रमुख दिपक कार्कीले यस कार्यक्रमलाई बिस्तारै अझ व्यवस्थित बनाउने योजना रहेको जानकारी दिए । उनले भने, ‘यो कार्यक्रम मार्फत हामी मातृ स्वास्थ्य सेवाको पहुँच र गुणस्तर दुवैमा सुधार ल्याउनेछौं ।’

विश्व स्वास्थ्य संगठनका अनुसार गर्भावस्था वा सुत्केरीका जटिलताले विश्वभर दैनिक झण्डै ८ सय महिलाको मृत्यु हुने गर्छ । नेपालजस्तो विकासोन्मुख मुलुकमा अझै पनि सुरक्षित मातृत्व पहुँचबाहिर छ । यो कार्यक्रमले स्वास्थ्य सेवा पहुँचमा सुधार ल्याउने, गरिब तथा विपन्न महिलाहरूको जीवन रक्षा गर्ने र मातृ मृत्युदर घटाउने दिशामा एक सकारात्मक कदमको रूपमा लिइएको छ ।