रौतहट, २ असार । रौतहटको गौरस्थित प्रादेशिक अस्पतालले सरकारी सेवा स्कोरिङ (एसएस स्कोरिङ) मा ९१ प्रतिशत अंक हासिल गर्दै मधेश प्रदेशभरिमा लगातार दोस्रोपटक पहिलो स्थान हात पारेको छ ।

तीन महिनाअघि सम्पन्न स्कोरिङमा ८९ प्रतिशत अंकसहित शीर्ष स्थानमा रहेको गौर अस्पतालले यसपटक अंकमा सुधार गर्दै फेरि अग्रता कायम राखेको हो ।

अस्पतालका अध्यक्ष मोहम्मद अनवर हाशमीले गौर अस्पतालको विगतलाई स्मरण गर्दै ‘रेफर अस्पताल’ को संज्ञा पाउने अवस्थाबाट अब आधुनिक र सक्षम सेवा केन्द्रको रुपमा उभिन सफल भएको बताए ।

अस्पतालको यो सफलताको श्रेय मेडिकल सुपरिटेन्डेन्ट डा. मुरारी ठाकुरको कुशल नेतृत्व, पारदर्शी व्यवस्थापन, समयमै औषधि तथा उपकरणको उपलब्धता र बिरामी–केन्द्रित सेवाहरूलाई दिइएको छ । डा. ठाकुरका अनुसार विगत तीन वर्षमा आठौँ स्थानबाट सुरु गरिएको सुधार यात्राले अस्पताललाई प्रदेशको नमुना बनाएको छ ।

गौरमा आयोजित एसएस स्कोरिङ सार्वजनिक कार्यक्रममा प्रमुख जिल्ला अधिकारी विनोद कुमार खड्का, प्रहरी उपरीक्षक नेत्रमणि गिरी, स्वास्थ्य कार्यालय रौतहटका प्रमुख राजेश कुमार सिंह, लेखापाल जितेन्द्र यादव, स्कोरिङ टोलीका सदस्य तथा सञ्चारकर्मीहरूको उपस्थिति रहेको थियो ।

स्वास्थ्यकर्मीहरूले गौर अस्पतालको यो उपलब्धिलाई प्रदेश सरकारका लागि प्रेरणादायी मोडेलको रूपमा लिने बेला आएको बताएका छन् । अस्पताल प्रशासनले आगामी दिनमा सेवा स्तर अझ सुधार गर्दै निरन्तर उत्कृष्टता कायम राख्ने प्रतिबद्धता जनाएको छ ।