जनकपुरधाम उपमहानगरपालिकाको शिक्षा शाखाले आइतबार जारी गरेको सूचनामा भनिएको छ, ‘असार १ गतेको निर्णयअनुसार अत्यधिक गर्मीका कारण असार २ गतेदेखि थप गरिएको विदा खारेज गरिएको छ ।’ पत्रमा सबै सामुदायिक तथा संस्थागत विद्यालयहरूलाई भोलिदेखि नियमित कक्षा सञ्चालन गर्न सूचित गरिएको छ ।

यसअघि, मौसममा सुधार नभएको भन्दै उपमहानगरले असार ४ गतेसम्म विद्यालय विदा थप गरेको थियो । तर, मौसममा परिवर्तन आएपछि सो निर्णय फिर्ता लिएको हो ।
शिक्षा शाखा प्रमुख धीरेन्द्र लाल कर्णका अनुसार गर्मी अझै केही हदसम्म कायम रहेकाले बिहानको समयमा विद्यालय सञ्चालन गर्न पनि अनुरोध गरिएको छ । ‘छात्रछात्राको स्वास्थ्य र सुरक्षा ख्याल गर्दै बिहानै विद्यालय सञ्चालन गर्न आग्रह गरिएको छ,’ उनले जानकारी दिए ।

यस निर्णयसँगै जनकपुरधाम क्षेत्रका सबै विद्यालयहरूमा भोलिदेखि कक्षा नियमित रूपमा सञ्चालन हुनेछन् ।