जनकपुरधाम, ३१ जेठ । अत्यधिक गर्मीका कारण बालबालिकाको स्वास्थ्यमा पर्न सक्ने प्रतिकूल असरलाई ध्यानमा राख्दै जनकपुरधामका सबै सामुदायिक तथा संस्थागत विद्यालयहरूमा पुनः दुई दिनका लागि पठनपाठन बन्द गरिएको छ ।

स्थानीय तहको निर्देशनअनुसार यसअघि पनि एक चरणको विदा दिइएकोमा अब पुनः अर्को चरणमा असार १ गतेदेखि ४ गतेसम्म जम्मा चार दिन वर्षे विदाबाट कट्टा हुने गरी पठनपाठन स्थगित गरिएको हो ।

मौसममा सुधार आएलगत्तै पठनपाठन नियमित हुने जनकपुरधाम उपमहानगरपालिकाका शिक्षा तथा खेलकुद विकास शाखा प्रमुख धीरेन्द्र लाल कर्णले जानकारी दिए ।

उपमहानगरले अभिभावक, शिक्षक, विद्यार्थी तथा सबै सरोकारवालालाई उक्त सूचना गम्भीरतापूर्वक लिइ आवश्यक तयारी गर्न आग्रह गरेको छ ।

गर्मीबाट जोगिन पर्याप्त पानी सेवन गर्ने, हावा हुने स्थानमा बस्ने र बाहिरको कार्यलाई सकेसम्म सीमित राख्न सुझाव दिइएको छ ।