जनकपुरधाम, २८ जेठ । कराँते खेलको प्रचारप्रसार तथा अनुशासित र स्वस्थ युवा पुस्ता निर्माण गर्ने उद्देश्यले जनकपुरधाममा १८औं राष्ट्रिय सोतोकान कराँते प्रतियोगिता तथा दोस्रो वडा अध्यक्ष कप प्रतियोगिता आयोजना हुने भएको छ ।

जनकपुरधाम उपमहानगरपालिका–८ को आयोजनामा तथा नेपाल सोतोकान कराँते संघ धनुषा र मधेश प्रदेश खेलकुद परिषद्को सहकार्यमा प्रतियोगिता जेठ ३१ गतेदेखि असार १ गतेसम्म सञ्चालन हुनेछ । प्रतियोगिता धनुषा जिल्ला खेलकुद विकास समिति कभर्ड हलमा सम्पन्न हुने आयोजकले जनाएको छ ।

उपमहानगर–८ का वडाध्यक्ष दिनेश सिंहले प्रतियोगिताले युवाहरूमा खेलप्रतिको लगाव, अनुशासन र राष्ट्रप्रेमको भावना थप बलियो बनाउने विश्वास व्यक्त गरे । उनले देशभरिका विभिन्न जिल्लाबाट कराँते खेलाडीहरूको सहभागिता रहने जानकारी दिँदै प्रतियोगिताले जनकपुरधामलाई खेलकुदको केन्द्रका रूपमा उजागर गर्न भूमिका खेल्ने बताए ।

प्रतियोगिताको उद्घाटन समारोह जेठ ३१ गते बिहान ११ बजे हुनेछ । उद्घाटन कार्यक्रममा मधेश प्रदेश खेलकुद परिषद्का सदस्य सचिव शिवजी प्रसाद गुप्ता प्रमुख अतिथिका रूपमा सहभागी हुनेछन् ।

त्यसैगरी समापन समारोह असार १ गते दिउँसो १२ बजे हुने तय गरिएको छ । समापन समारोहमा राष्ट्रिय युवा संघ नेपालका अध्यक्ष क्षितिज थेबे प्रमुख अतिथिका रूपमा रहनेछन् ।

मधेश खेलकुद परिषद्का सदस्य लभ कुमार अधिकारीले कराँते प्रशिक्षक, खेलाडी तथा खेलप्रेमीहरूलाई कार्यक्रममा सक्रिय सहभागिताका लागि आह्वान गरेका छन् ।

प्रतियोगिता सफल बनाउन विभिन्न वडाका जनप्रतिनिधि, सुरक्षाकर्मी, खेल सङ्घसंस्था र स्वयंसंसेवकहरूको समेत सहयोग रहने आयोजकले जनाएको छ ।