जनकपुरधाम, २७ जेठ । राजर्षि जनक विश्वविद्यालयको पहिलो दीक्षान्त समारोह ऐतिहासिक रूपमा जनकपुरधाममा सम्पन्न भएको छ । विश्वविद्यालयका कुलपति समेत रहेका प्रधानमन्त्री केपी शर्मा ओलीको प्रमुख आतिथ्यमा आयोजित कार्यक्रममा ११४ जना स्नातक तथा स्नातकोत्तर तहका विद्यार्थीहरू दीक्षित भए ।

समारोहलाई सम्बोधन गर्दै प्रधानमन्त्री ओलीले जनकपुरधामलाई सत्ययुगदेखिको ज्ञान, दर्शन र सभ्यताको केन्द्रको रूपमा स्मरण गरे । ‘४ हजार वर्षपछि हामी फेरि त्यही भूमिमा फर्किएका छौं, जहाँ सत्ययुगमा विचार र दर्शनका गहिरा बहसहरू हुन्थे,’ ओलीले भने, ‘बीचको इतिहासमा केही बिरलै विद्वानहरू देखिए । तर, संस्थागत ज्ञानको निरन्तरता हरायो ।’

ओलीले ढिलो गरी विश्वविद्यालय स्थापना हुनुमा राज्यको शासकीय कमजोरी र राजनीतिक स्वार्थ जिम्मेवार रहेको भन्दै अबको यात्रा समृद्धि र सुधारको हुने विश्वास व्यक्त गरे । उनले पूर्वीय दर्शनलाई अन्धविश्वासको संज्ञा दिँदै खारेज गर्न खोज्ने प्रवृत्तिप्रति आपत्ति जनाउँदै त्यसमा गहिरो तात्त्विक मूल्य रहेको तर्क प्रस्तुत गरे ।

प्रधानमन्त्री ओलीले नेपालमा विश्वविद्यालयको ऐतिहासिक परम्परा करिब २८ सय वर्ष पुरानो रहेको उल्लेख गर्दै भने, ‘हाम्रो ज्ञान परम्परा गम्भीर छ । प्रचारमा पछि परेका हौं ।’ उनले राजर्षि जनक विश्वविद्यालयका दीक्षित विद्यार्थीहरू भविष्यमा अन्तर्राष्ट्रिय प्रतिस्पर्धामा उत्रन सक्ने क्षमता राख्ने विश्वास व्यक्त गरे ।

दीक्षित विद्यार्थीहरूलाई प्रेरणा दिँदै उनले भने, ‘रुचिको विषय पढेमा र परिश्रम गरेमा प्रत्येक विद्यार्थीले आफ्नो सम्भावनाको उच्चतम सीमा छुने सक्छ । विद्याले विनय दिन्छ, विनयले पात्रता र पात्रताले धन तथा सुख ।’

समारोहमा मधेश प्रदेशका मुख्यमन्त्री सतिश कुमार सिंहले प्रदेशमा बढ्दो निरक्षरता दरप्रति चिन्ता व्यक्त गर्दै विश्वविद्यालयले भविष्यको समृद्ध समाज निर्माणमा योगदान पुर्याउने धारणा राखे । उनले राजर्षि जनक विश्वविद्यालयलाई अन्य विश्वविद्यालयसरह अनुदान उपलब्ध गराउन विश्वविद्यालय अनुदान आयोगसँग आग्रह गरे ।

वरिष्ठ साहित्यकार डा. राजेन्द्र विमलले दीक्षित विद्यार्थीहरूले समाजको रूपान्तरणमा अग्रसर भूमिका खेल्ने विश्वास व्यक्त गरे । उपकुलपति प्रा. डा. अमरप्रसाद यादवले छोटो अवधिमै विश्वविद्यालयले प्रतिस्पर्धात्मक जनशक्ति उत्पादन गरिरहेको जानकारी दिँदै हाल करिब २ हजार ८ सय विद्यार्थी अध्ययनरत रहेको बताए ।

समारोहअगाडि प्रधानमन्त्री ओलीको अध्यक्षतामा विश्वविद्यालय सिनेट बैठकसमेत बसेको थियो । बैठकमा आगामी कार्ययोजना, शैक्षिक कार्यक्रम र पूर्वाधार विस्तारबारे छलफल गरिएको थियो ।