पर्सा, २५ जेठ । वीरगंज महानगरपालिका–१४ पिपरा क्षेत्रमा आइतबार दिउँसो भएको एक भयावह सडक दुर्घटनामा एक युवकको ज्यान गएको छ भने अन्य तीनजना गम्भीर घाइते भएका छन् ।

तीव्र गतिमा अनियन्त्रित भएर डिभाइडरमा ठोक्किएको भारतीय नम्बर प्लेटको कार दुर्घटनाग्रस्त हुँदा यात्रुहरू गम्भीररूपमा घाइते भएका हुन् ।

बीआर ५५ बी ९१०४ नम्बरको भारतीय कार गण्डकबाट बसपार्कतर्फ आउँदै गर्दा दिउँसो करिब ३ः१० बजे रेनुका पेट्रोल पम्प नजिकै सडक डिभाइडरमा ठोक्किएको थियो । जिल्ला प्रहरी कार्यालय पर्साका प्रवक्ता प्रहरी नायब उपरीक्षक सुवास भट्टका अनुसार कारको गति अत्यन्त तीव्र थियो । चालकले नियन्त्रण गुमाएका कारण दुर्घटना भएको प्रारम्भिक अनुमान गरिएको छ ।

दुर्घटनापछि चारै जना गम्भीर घाइते भएका यात्रुहरूलाई तत्कालै बारास्थित एलएस न्युरो अस्पतालमा पुर्याइएको थियो । तर, करिब ३० वर्षीय बिटु सर्राफको टाउको, मुख र कानमा गम्भीर चोट लागेको कारण दिउँसो ३ः५० बजे अस्पतालले उनलाई मृत घोषणा गरेको थियो । अस्पताल स्रोतका अनुसार मस्तिष्कमा गम्भीर चोटका कारण उनको ज्यान जोगाउन सकिएन ।

घाइतेहरूमा भारतको बेतिया नरकटियागञ्ज निवासी ४० वर्षीय चालक गणेश सर्राफ, २० वर्षीय रतन सर्राफ र २१ वर्षीय अर्का बिटु सर्राफ रहेका छन् । चालक सर्राफको टाउको र शरीरका विभिन्न भागमा चोट लागेको छ । रतन सर्राफको बायाँ हातमा चोट लागेको छ भने अर्का बिटु सर्राफको दायाँ खुट्टा, छाती र टाउकोमा गम्भीर चोट रहेको प्रहरीले जनाएको छ ।

दुर्घटनाग्रस्त कार प्रहरीले नियन्त्रणमा लिएको छ भने घटनाको विस्तृत अनुसन्धान भइरहेको जिल्ला प्रहरी कार्यालय पर्साले जनाएको छ ।