जनकपुरधाम, २१ जेठ । रौतहटको चन्द्रपुर नगरपालिका–१ स्थित पूर्व–पश्चिम राजमार्गमा बुधबार बिहान भएको सवारी दुर्घटनामा दुई जनाको मृत्यु भएको छ भने दुई जना घाइते भएका छन् ।

सर्लाहीको बरहथवाबाट चन्द्रनिगाहपुरतर्फ जाँदै गरेको विद्युतीय सोकोन गाडी (बागमती प्रदेश ०३–००१ ज ०४५२) र विपरीत दिशाबाट आइरहेको ट्रक (मधेश प्रदेश ०३–००१ ख ८६००) मंगलपुर नजिक साइडपट्टी ठोक्किँदा दुर्घटना भएको इलाका प्रहरी कार्यालय चन्द्रनिगाहपुरले जानकारी दिएको छ ।

दुर्घटनामा परी सर्लाही रामनगर–१ की ३६ वर्षीया भगिया देवीको घटनास्थलमै मृत्यु भएको हो । गम्भीर घाइते भएका सोही ठाउँका ३० वर्षीय धिरेन्द्र ठाकुरको उपचारको क्रममा ज्यान गएको प्रहरीले पुष्टि गरेको छ ।

यस्तै सोही गाडीमा सवार १८ वर्षीया रानीकुमारी यादव र रौतहट दुर्गाभगवती गाउँपालिका–५ का १९ वर्षीय सरोज ठाकुर घाइते भएका छन् । उनीहरूको चन्द्रपुर अस्पतालमा उपचार भइरहेको छ र अवस्था खतरामुक्त रहेको बताइएको छ ।

घटनापछि ट्रक चालक मकवानपुर हेटौंडा–१३ का ग्यालसेन थोकर र विद्युतीय गाडीका चालक सर्लाही रामनगर–३ का आकाश सिंहलाई प्रहरीले नियन्त्रणमा लिई आवश्यक अनुसन्धान सुरु गरेको इलाका प्रहरी कार्यालय चन्द्रनिगाहपुरका डीएसपी राजकुमार राईले जानकारी दिए ।

यो दुर्घटना ट्राफिक सुरक्षामा लापरवाही र तिव्र गतिका कारण भएको हुनसक्ने प्रारम्भिक अनुमान गरिएको छ ।