जनकपुरधाम, १४ जेठ । जनकपुरधामको केन्द्र भानुचोकस्थित मिथिला मोन्टेसरी स्कूलमा मंगलबार भएको हातपात र आक्रमणको घटनाले सम्पूर्ण शैक्षिक समुदायमा चिन्ता र आक्रोश फैलिएको छ ।

अज्ञात समूहद्वारा विद्यालयमा प्रवेश गरी कर्मचारीमाथि आक्रमण गरेको घटनालाई शिक्षा क्षेत्रमाथिको प्रत्यक्ष आक्रमणको रूपमा लिँदै शैक्षिक संगठनहरूले संयुक्त विरोध जनाएका छन् ।

घटनाबारे विवरण अनुसार मंगलबार अपराह्न करिब साढे ३ बजे १५–२० जनाको अज्ञात समूह विद्यालय परिसरमा प्रवेश गरी एक कर्मचारीमाथि दुर्व्यवहार र हातपात गरेका थिए । उक्त आक्रमणका कारण त्यहाँ अध्ययनरत विद्यार्थीहरूमा समेत त्रास फैलिएको थियो । आक्रान्त समूहले विद्यालयको शान्तिपूर्ण वातावरणमा आतङ्क सिर्जना गरि बालबालिकाको मानसिक सुरक्षामाथि समेत आघात पुर्याएको छ ।

घटनापछि निजी विद्यालय संगठनहरू प्याब्सन, एनप्याब्सन र हिसानले संयुक्त विज्ञप्ति जारी गरी आक्रोश पोखेका छन् । ‘शिक्षा संस्था कुनै पनि हालतमा आक्रमणको स्थल बन्नु हुँदैन,’ विज्ञप्तिमा भनिएको छ, ‘यस्ता घटना जनकपुरधामलाई शैक्षिक हब बनाउने सरकारको योजनामा बाधा बन्न सक्छ ।’

उनीहरूले दोषीको शीघ्र पहिचान गरी कडा कानुनी कारबाही गर्न माग गर्दै जनकपुरधाम उपमहानगरपालिका र जिल्ला प्रशासन कार्यालयलाई शिक्षा क्षेत्रप्रति गम्भीर बन्न आग्रह गरेका छन् । संगठनहरूका अनुसार विद्यालयहरूमा बारम्बार भइरहेका यस्ता घटनाले निजी शैक्षिक संस्थाहरूको अस्तित्व नै संकटमा पार्ने खतरा छ ।

नेपाल शिक्षक महासंघ धनुषाले पनि घटनाप्रति आपत्ति जनाउँदै दोषीउपर कडा कारबाहीको माग गरेको छ । महासंघका सचिव (अर्थ) रामानन्द यादवद्वारा जारी विज्ञप्तिमा भनिएको छ, ‘शिक्षक तथा कर्मचारीहरूमाथिको आक्रमण केवल शारीरिक क्षति मात्र नभई शिक्षा प्रणालीमाथिको नै अतिक्रमण हो । महासंघ यस्ता घटनामा चुप लागेर बस्दैन ।’

शिक्षक महासंघ र निजी विद्यालय संगठनहरूले राज्यलाई शैक्षिक संस्थाको सुरक्षा सुनिश्चित गर्नुपर्ने संवैधानिक र नैतिक जिम्मेवारी सम्झाउँदै आगामी दिनमा यस्ता घटनाहरू दोहोरिए शिक्षा क्षेत्रमा व्यापक असन्तोष उत्पन्न हुने चेतावनीसमेत दिएका छन् ।

शैक्षिक स्वतन्त्रता र विद्यार्थीको मनोबल संरक्षणको सवालमा सरकारले तत्काल निष्पक्ष अनुसन्धान थाल्नुपर्ने, दोषीमाथि कडा कारबाही गर्नु पर्ने र शिक्षा संस्थाहरूमा शान्तिपूर्ण र सुरक्षित वातावरण सुनिश्चित गर्नु पर्ने माग सार्वजनिक गरिएको छ ।

यदि प्रशासनले यस्ता घटनालाई गम्भीरतापूर्वक नलिए शिक्षा क्षेत्रका सबै पक्ष आन्दोलनमा जान बाध्य हुने शैक्षिक संगठनहरूको चेतावनी छ ।