जनकपुरधाम, १४ जेठ । ‘शिक्षा नै उज्यालो भविष्यको आधार हो’ भन्ने सोचका साथ समाजसेवामा अग्रसर जनकपुरस्थित मारवाडी युवा मञ्चले विपन्न पृष्ठभूमिका बालबालिकाहरूको शिक्षामा सहयोग पुर्याउने उद्देश्यले धनुषाको एक दूरवर्ती विद्यालयमा शैक्षिक तथा खेलकुद सामग्री वितरण गरेको छ ।

बुधबार मञ्चले मुखियापटी मुसहरनिया गाउँपालिका–१ खतवैयास्थित एकल विद्यालयमा अध्ययनरत २५ जना विद्यार्थीलाई आवश्यक शैक्षिक सामग्रीसहित केही खेलकुद सामग्री प्रदान गरेको हो । वितरण गरिएका सामग्रीमा काँपी, किताब, झोला, पेन्सिल, रबर, स्केल लगायतका शैक्षिक सामग्री थिए भने खेलकुद सामग्रीमा फुटबल, भलिबल, चेस बोर्ड लगायतका सामग्री समावेश थिए ।

मारवाडी युवा मञ्चका अध्यक्ष राहुल सिंहानियाका अनुसार सो विद्यालयका अधिकांश विद्यार्थी अत्यन्तै विपन्न वर्गका हुन् र अध्ययनका लागि आवश्यक सामग्री जुटाउन पनि उनीहरूलाई मुस्किल पर्छ । ‘हामीले प्रदान गरेका यी सामग्रीहरूले विद्यार्थीहरूलाई अध्ययनमा सहजता ल्याउने र उनीहरूको आत्मविश्वास बढाउने विश्वास लिएका छौं,’ उनले भने ।

विद्यालयमा आयोजित वितरण कार्यक्रममा शिक्षक, विद्यालय व्यवस्थापन समितिका सदस्य तथा स्थानीय अभिभावकहरूको बाक्लो उपस्थिति रहेको थियो । कार्यक्रममा बोल्दै शिक्षकहरूले मारवाडी युवा मञ्चको प्रयासप्रति आभार व्यक्त गर्दै यस्ता सामाजिक उत्तरदायित्वमा नागरिक समाजको सहभागिता आवश्यक रहेको उल्लेख गरे ।

स्थानीय अभिभावकहरूले पनि यस सहयोगबाट आफ्ना बालबालिकालाई विद्यालय आउन थप हौसला मिल्ने जनाए । ‘हामी आर्थिक रूपमा कमजोर छौं । छोराछोरीलाई पढाउने साधन जुटाउन हम्मेहम्मे पर्छ । यस्तो सहयोगले ठूलो राहत मिलेको छ,’ एक अभिभावकले भने ।

मञ्चले शिक्षा, स्वास्थ्य र सरसफाइजस्ता सामाजिक क्षेत्रमा निरन्तर काम गर्दै आएको छ । अध्यक्ष सिंहानियाका अनुसार आगामी दिनमा पनि विभिन्न जिल्लाका गरिब तथा सीमान्तकृत समुदायका बालबालिकालाई लक्षित गर्दै यस्ता सहयोग कार्यक्रमलाई अझ व्यापक रूपमा विस्तार गर्ने योजना बनाइएको छ ।