जनकपुरधाम, १२ जेठ । मधेश प्रदेशका विभिन्न स्थानीय तहहरूबीच स्वास्थ्य सेवा सुधार तथा आधारभूत सेवा विस्तारका विषयमा अनुभव साझा गर्दै गरिएको एक संवाद कार्यक्रममा सहभागीहरूले जनताको स्वास्थ्य सेवा गुणस्तरीय बनाउन स्थानीय सरकारहरू अझ जिम्मेवार र सशक्त बन्नु आवश्यक रहेकोमा जोड दिएका छन् ।

नेपाल सरकारको स्वास्थ्य मन्त्रालयअन्तर्गतको उपचारात्मक महाशाखा टेकु र विश्व स्वास्थ्य संगठनको सहकार्यमा जनकपुरधाममा आयोजित नीति संवाद कार्यक्रममा विभिन्न नगरपालिका तथा गाउँपालिकाका प्रमुख, स्वास्थ्य शाखा प्रमुख तथा जिल्ला स्वास्थ्य कार्यालयका प्रतिनिधिहरू सहभागी भएका थिए ।

कार्यक्रममा सर्लाही जिल्लाको हरिवन नगरपालिकाले प्रस्तुत गरेको अनुभव विशेष चर्चाको केन्द्रमा रह्यो । नगरप्रमुख रमेश बुढाथोकीले नगरका सबै वडाका ३ हजार १०० जना ज्येष्ठ नागरिकलाई नियमित निःशुल्क प्रेसर, सुगर, थाइराइड जाँच तथा आवश्यक औषधि वितरण गरिँदै आएको जानकारी दिए ।

उनका अनुसार नगरपालिकाले मासिक स्वास्थ्य शिविर, घरदैलो उपचार कार्यक्रम तथा सम्पूर्ण नगर क्षेत्रमा निःशुल्क सेनेटरी प्याड वितरण जस्ता अभियानहरू पनि निरन्तरता दिइरहेको छ । ‘यस्ता कार्यक्रमहरूलाई दीगो बनाउन थप बजेट र स्वास्थ्य जनशक्तिको आवश्यकता छ,’ बुढाथोकीले स्पष्ट गरे ।

पर्सा जिल्लाको पोखरीया नगरपालिकाका प्रमुख प्रधुम्न प्रसाद चौधरीले पालिकाको इच्छाशक्ति हुँदा पनि जनशक्ति तथा स्रोतको अभावले सेवाको गुणस्तर घटिरहेको बताए । ‘औषधि समयमा खरिद गर्न नपाउँदा सेवाग्राही निराश हुन्छन्,’ उनले भने ।

त्यस्तै, सप्तरीको हनुमाननगर कंकालनी नगरपालिकाका प्रमुख विरेन्द्र माझीले संघीय सरकारले स्वास्थ्यतर्फको बजेट कटौती गर्दा पालिकाहरूलाई सेवा दिन निकै कठिन भएको गुनासो गरे । ‘हामीले सबै उपाय अपनाएका छौं । तर, बजेट बिना योजना कार्यान्वयन गर्न सकिँदैन,’ माझीको भनाइ थियो ।

कार्यक्रममा स्वास्थ्य मन्त्रालयको उपचारात्मक महाशाखाका निरीक्षक कमलेश मिश्रले यस्तो संवाद कार्यक्रमले स्थानीय तहको आवाजलाई केन्द्रसम्म पुर्याउने पुलको काम गर्ने विश्वास व्यक्त गरे । उनले वर्तमानमा सरकारबाट ९८ प्रकारका औषधि निःशुल्क उपलब्ध गराइएको र आगामी बजेटमा आधारभूत तथा आकस्मिक स्वास्थ्य सेवालाई प्राथमिकतामा राखिने जानकारी दिए ।

त्यस्तै, मधेश प्रदेश स्वास्थ्य निर्देशनालयका निर्देशक डा. सरोज न्यौपानेले स्थानीय तहहरूसँग सहकार्य गरेर प्रदेशभर स्वास्थ्य पूर्वाधार र सेवा सुधारको पहल भइरहेको बताए । ‘केन्द्रिकृत शासनको तुलनामा स्थानीय सरकारहरूले जनताको स्वास्थ्यमा बढी प्रभावकारी भूमिका खेलेका छन्,’ उनले निष्कर्ष सुनाए ।