ज्नकपुरधाम, ६ जेठ । नेपाल क्षयरोग निवारण संस्था धनुषा शाखाको आयोजना र जनकपुरधाम उपमहानगरपालिका वडा नं. १० को समन्वयमा मंगलबार जनस्वास्थ्यप्रति जागरुकता बढाउने उद्देश्यसहित एकदिने ‘क्षयरोग निवारण अभिमुखीकरण कार्यक्रम’ सम्पन्न गरिएको छ ।

कार्यक्रम जनकपुरधाम–१० स्थित सीताराम प्राथमिक विद्यालयको सभाहलमा सम्पन्न भएको हो । कार्यक्रममा विभिन्न वडास्तरीय सामाजिक अगुवा, शिक्षक, महिलासमूह प्रतिनिधि, स्वास्थ्यकर्मी तथा युवाहरूको उल्लेखनीय उपस्थिति रहेको थियो । केन्द्रीय सदस्य श्रवणकुमार साह कार्यक्रमका प्रमुख अतिथिका रूपमा उपस्थित थिए ।

कार्यक्रममा बोल्दै प्रमुख अतिथि साहले भने, ‘क्षयरोग अझै पनि हाम्रो समाजमा चुनौतीको रूपमा रहँदै आएको छ । यसलाई नियन्त्रण गर्न केवल सरकार वा संस्थाले मात्र नभई सम्पूर्ण समुदायको सक्रिय सहभागिता आवश्यक छ ।’ उनले समुदायस्तरबाट जनचेतना अभियानलाई तीव्र बनाउँदै रोग पहिचान, उपचार र पुनः संक्रमण रोक्न सबैले भूमिका खेल्नुपर्नेमा जोड दिए ।

अभिमुखीकरण सत्रमा स्वास्थ्य क्षेत्रका विज्ञहरूले क्षयरोगको लक्षण, संक्रमणको प्रकृति, उपचार विधि, निःशुल्क सेवा सुविधा, रोगीको सामाजिक पुनस्र्थापना लगायतका विषयमा सहभागीहरूलाई जानकारी दिए ।

नेपाल क्षयरोग निवारण संस्था धनुषा शाखाका प्रतिनिधिले आगामी दिनमा धनुषाका अन्य वडाहरूमा पनि यस्ता कार्यक्रम निरन्तर सञ्चालन गरिने जानकारी दिए ।