जनकपुरधाम, ५ जेठ । जनकपुरधाममा आयोजित तेस्रो मेयर कप टी–२० क्रिकेट प्रतियोगिताको सफल समापनसँगै जनकपुरधाम उपमहानगरपालिकाले खेलकुद पत्रकारितामा सक्रियता, निरन्तरता र प्रभाव पार्न सफल तीन पत्रकारलाई विशेष सम्मान प्रदान गरेको छ ।

स्थानीय स्तरमा पहिलो पटक यस्तो औपचारिक सम्मान कार्यक्रम आयोजना गर्दै उपमहानगरपालिकाले खेल पत्रकारको भूमिकालाई संस्थागत रूपमा कदर गरेको हो ।

जनकपुरधाममा सोमबार आयोजित एक विशेष कार्यक्रममा कान्तिपुर दैनिकका संवाददाता कमलेश ठाकुर, रेडियो नेपालका अजय झा र टिभी टुडे तथा प्राइम टिभीकी संवाददाता चाँदनी झालाई सम्मान गरिएको हो । उनीहरूलाई सम्मानपत्र, दोसल्ला र नगद पुरस्कारसहित अभिनन्दन गरिएको थियो ।

कार्यक्रममा जनकपुरधाम उपमहानगरपालिकाका मेयर मनोज कुमार साहले तीनै पत्रकारलाई सम्मान गर्दै भने, ‘खेलकुदको विकास खेलाडीका प्रयास मात्र नभई त्यसको लोकप्रियता र पारदर्शिता निर्माणमा पत्रकारहरूको भूमिका अतुलनीय छ । उनीहरूलाई कदर गर्नु भनेको खेलकुद क्षेत्रको दीर्घकालीन समृद्धिमा लगानी गर्नु हो ।’

पत्रकारको छनोट निष्पक्ष र वस्तुगत होस् भन्ने हेतुले पाँच सदस्यीय छनोट समिति गठन गरिएको थियो । समितिमा पत्रकार अजित तिवारी, नेपाल पत्रकार महासंघ धनुषाका सचिव बटुकनाथ झा, महासंघका निवर्तमान केन्द्रीय सदस्य रिंकु मिश्र ‘गायत्री’, जिल्ला क्रिकेट संघ धनुषाका सचिव आशिष झा र सरोज मिश्र सदस्य थिए ।

छनोट समितिले पत्रकारहरूको लेख र रिपोर्टहरूको निरन्तरता, विषयको प्रस्तुति, खेलकुद क्षेत्रमा प्रभाव र जनचेतनामूलक योगदानका आधारमा उत्कृष्टता निर्धारण गरेको थियो ।

सम्मानित पत्रकारहरूले जनकपुरधाम उपमहानगरपालिकाको यो पहललाई स्थानीय पत्रकारिता क्षेत्रमा सकारात्मक सन्देश प्रवाह गर्ने उल्लेख गरे ।