जनकपुरधाम, ५ जेठ । जनकपुरधामस्थित मोनास्टिक स्कुलले नयाँ शैक्षिक सत्रको प्रारम्भसँगै कक्षा १ देखि ९ सम्म भर्ना भएका नव–आगन्तुक विद्यार्थीहरूको स्वागतका लागि विशेष ओरिएन्टेसन सेसनको आयोजना गरेको छ ।

विद्यालयमा पहिलोपटक आएका विद्यार्थीहरूलाई विद्यालयको वातावरण, मूल्य–मान्यता र भावी यात्राको बारेमा जानकारी गराउँदै उत्साह, उमंग र आत्मीयता सँगै सेसन सम्पन्न भएको हो ।

ओरिएन्टेसन सत्रको शुरुवात आइस–ब्रेकिङ क्रियाकलापबाट भएको थियो । विद्यार्थीहरूले रमाइलो ढंगले आफैंलाई चिनाउने, नयाँ साथीहरू बनाउने र आपसमा संवाद विस्तार गर्ने अवसर पाए । यस्ता गतिविधिले उनीहरूमा आपसी आत्मीयता र समूह भावना विकास गर्न मद्दत गरेको विद्यालयका निर्देशक डा. सोनु साहले बताए ।

कार्यक्रममा मोनास्टिक स्कुलका निर्देशक साहले विद्यार्थीहरूलाई स्वागत गर्दै विद्यालयको इतिहास, लक्ष्य, भविष्यको योजना तथा मार्गदर्शक मूल्यहरूबारे जानकारी गराए । उनले विद्यालयले शैक्षिक, भावनात्मक, सामाजिक र सिर्जनात्मक पक्षको समुचित विकासमा जोड दिने बताए ।

डा. सोनुले भने, ‘मोनास्टिक केवल पठन–पाठनको थलो मात्र नभई यो प्रत्येक विद्यार्थीको प्रतिभा उजागर गर्ने प्रयोगशाला हो । हामी विश्वास गर्छौं कि प्रत्येक विद्यार्थी विशेष हुन्छ र उनीहरूलाई सही मार्गदर्शन, स्नेह र अवसर दिइयो भने उनीहरू असाधारण बन्न सक्छन् ।’

कक्षा ६ मा नयाँ भर्ना भएका एकजना विद्यार्थीले भने, ‘म आज धेरै डराएर आएको थिएँ, किनभने मैले कसैलाई चिनेको थिइनँ । तर, ओरिएन्टेसनमा साथीहरूसँग खेल्दै चिनाजानी हुँदा रमाइलो भयो । सर–म्यामहरूले हामीलाई राम्रो व्यवहार र आत्मविश्वासका बारेमा बताए । अब मलाई यहाँ पढ्न झनै रमाइलो लाग्ने भयो ।’

विद्यालयले ओरिएन्टेसनमार्फत नयाँ विद्यार्थीहरूलाई विद्यालयमा अपनत्वको भावना दिलाउने मात्र नभई उनीहरूको शैक्षिक यात्रा आत्मविश्वासपूर्वक सुरु गराउने वातावरण तयार पारेको छ । अभिभावकहरूबाट समेत विद्यालयको यस्तो पहलप्रति सकारात्मक प्रतिक्रिया आएको छ ।