जनकपुरधाम, ४ जेठ । जनकपुरधामस्थित रामस्वरुप रामसागर बहुमुखी क्याम्पस (राराब)ले परीक्षामा बढ्दो मोबाइल दुरुपयोग र चोरी नियन्त्रणका लागि परीक्षा हलमा मोबाइल लैजान पूर्णतः प्रतिबन्ध लगाउने निर्णय गरेको छ ।

क्याम्पस प्रशासनले सूचना जारी गर्दै चार वर्षे स्नातक तहको चौथो वर्षका परीक्षार्थीहरूलाई परीक्षा हलभित्र मोबाइल फोन लैजान नपाउने स्पष्ट पारेको हो । सूचना क्याम्पस प्रमुख प्रा. डा. बसन्तकुमार कर्णद्वारा आइतबार सार्वजनिक गरिएको छ ।

सूचनामा भनिएको छ, ‘विगतमा पटक–पटक मोबाइल निषेधसम्बन्धी सूचना जारी गरिए तापनि विद्यार्थीहरूले त्यसको अवहेलना गर्दै परीक्षा कक्षमा मोबाइल ल्याउने क्रम नरोकिएकाले अबको परीक्षामा उक्त कार्यलाई रोक्न थप कडाइ गरिनेछ ।’

क्याम्पसका प्राध्यापकहरूका अनुसार प्रत्येक परीक्षा सत्रमा विद्यार्थीहरू मोबाइलमार्फत प्रश्नपत्रको फोटो खिच्ने, उत्तर खोज्ने वा अरुसँग समन्वय गरेर चोरी गर्ने जस्ता गतिविधि हुने गरेको भन्ने गुनासो निकै समयदेखि उठ्दै आएको थियो ।

सूचनामा उल्लेख गरिएअनुसार कुनै परीक्षार्थी मोबाइलसहित भेटिएमा सो मोबाइल तुरुन्त जफत गरिनेछ र सम्पूर्ण विषयको परीक्षा सकिएपछि मात्र फिर्ता दिइनेछ ।

क्याम्पस प्रशासनले परीक्षामा डिजिटल उपकरणको प्रयोगमार्फत हुने अनियमितता नियन्त्रण गर्ने उद्देश्यले सबै परीक्षा हलमा निगरानी कडा पार्ने तयारी पनि गरिरहेको छ । विद्यार्थीहरूलाई यसअघि नै समयमै सूचित गरिएकाले अबको परीक्षामा कुनै बहाना नचल्ने क्याम्पस प्रशासनको भनाइ छ ।