जनकपुरधाम, ४ जेठ । प्राविधिक शिक्षा तथा व्यवसायिक तालिम परिषद् (सीटीइभीटी) अन्तर्गत सञ्चालित बीपी कोइराला प्राविधिक शिक्षालयका प्राचार्य तथा सहायक निर्देशक गोविन्द पौडेलमाथि विद्यार्थी संगठनले कालोमोसो दलेको छ ।

नेकपा (बहुमत) निकट अखिल (क्रान्तिकारी) विद्यार्थी संगठनका कार्यकर्ताहरूले आइतबार राजधानी काठमाडौँमा सार्वजनिक रूपमा पौडेलमाथि कालोमोसो दल्दै संस्थागत भ्रष्टाचारविरुद्ध आक्रोश व्यक्त गरेका हुन् ।

संगठनले पौडेललाई संस्थागत भ्रष्टाचारको केन्द्रबिन्दु भन्दै लामो समयदेखि विरोध गर्दै आएको थियो । विद्यार्थी संगठनका अनुसार पौडेलमाथि फेल भएका विद्यार्थीहरूलाई अवैध रूपमा पास गराउने, नक्कली प्रमाणपत्र निर्माण गर्ने र ती प्रमाणपत्रहरू आर्थिक लाभका लागि बिक्री गर्ने जस्ता गम्भीर आरोप छन् ।

घटनापछि प्रहरीले सो कार्यमा संलग्न रहेको आशंकामा संगठनका सचिवालय सदस्य तथा मधेश प्रदेश संयोजक आयुश घिमिरे र केन्द्रीय सदस्य तथा सिरहा जिल्ला अध्यक्ष रामदेव महरालाई नियन्त्रणमा लिएको छ । दुबै जनालाई हाल काठमाडौं प्रहरी परिसरको नियन्त्रणमा राखेर अनुसन्धान अघि बढाइएको जनाइएको छ ।

विद्यार्थी संगठनले पौडेलको राजीनामा माग गर्दै सम्बन्धित निकायसँग छानबिन गरी दोषीमाथि कडा कारबाही गर्न आग्रह गरेका छन् । संगठनका अनुसार उनीहरूको आन्दोलन कुनै व्यक्तिगत रिसइवी नभई शिक्षा क्षेत्रको शुद्धीकरण र भविष्यमा हुने सम्भावित अनियमितताको रोकथामका लागि हो ।

यता, बीपी कोइराला प्राविधिक शिक्षालय र सीटीइभीटी प्रशासनले घटनाप्रति गम्भीर ध्यान दिएको जनाएको छ । संस्थाले आन्तरिक छानबिन प्रक्रिया अघि बढाउने र सत्यतथ्य बाहिर ल्याउने बताएको छ । प्राचार्य पौडेल भने यसबारे मिडियासँग प्रत्यक्ष रूपमा प्रतिक्रिया दिन अनिच्छुक देखिए ।