जनकपुरधाम, ३ जेठ । भारतको प्रतिष्ठित शैक्षिक संस्थामध्ये एक संदिप युनिभर्सिटीले शनिबार ‘संदिप प्रतिभा सम्मान २०८१’ कार्यक्रम अन्तर्गत मधेश प्रदेशका उत्कृष्ट १० विद्यार्थीलाई नगद, शिल्ड र प्रमाणपत्रसहित सम्मान गरेको छ ।

जनकपुरधामस्थित विश्वविद्यालयको क्षेत्रीय कार्यालयमा आयोजित पत्रकार सम्मेलनमार्फत उत्कृष्ट विद्यार्थीहरूलाई सार्वजनिक रूपमा सम्मान गरिएको हो ।

गत वर्ष फागुन १० गते जनकपुरधामको ज्ञानकुप विद्यालयमा मधेश प्रदेशभरका कक्षा १२ मा अध्ययनरत ५६१ जना विद्यार्थीलाई लक्षित गर्दै आयोजना गरिएको प्रतियोगितात्मक परीक्षामार्फत यी विद्यार्थीहरूको छनोट गरिएको थियो ।

प्रतियोगितामा पहिलो स्थान हासिल गर्ने अंगद कुमार यादवलाई २१ हजार नगद, शिल्ड र प्रमाणपत्र प्रदान गरिएको छ । दोस्रो स्थान प्राप्त आयुष कर्णले १५ हजार , तेस्रो स्थानका विवेश कुमार यादवले ११ हजार, चौथो स्थानका वसन्त यादवले ८ हजार र पाँचौं स्थान प्राप्त गरेकी सृजना ठाकुरले ७ हजार नगदसहित शिल्ड प्राप्त गरेका छन् ।

त्यस्तै, स्वन्तना पुरस्कारको रूपमा उत्कृष्ट प्रदर्शन गर्ने अन्य पाँच विद्यार्थी सम्पूर्ण अधिकारी, अमन मिश्र, तृप्ती यादव, रुपेश मण्डल र आशुतोष कुमार झालाई ५ हजार नगद र शिल्ड प्रदान गरिएको छ ।

कार्यक्रममा बोल्दै युनिभर्सिटीका क्षेत्रीय व्यवस्थापक पंकज चौधरीले नेपालका विद्यार्थीहरूमा लुकेको प्रतिभालाई उजागर गर्न र उनीहरूको शैक्षिक यात्रामा सकारात्मक उत्प्रेरणा दिन यस्तो सम्मान कार्यक्रम आयोजना गरिएको बताए ।

उनले भने, ‘सिर्जनात्मक र प्रतिभाशाली विद्यार्थीहरूलाई पहिचान गरेर प्रोत्साहन दिनु नै शिक्षाको मूल उद्देश्य हो । यसरी गरिने सम्मानले विद्यार्थीलाई अझ जिम्मेवार, मेहनती र लक्ष्यप्रति समर्पित बनाउँछ भन्ने हाम्रो विश्वास छ ।’

संदिप युनिभर्सिटी भारतको नाशिक र मधुवनीमा अवस्थित उच्च शिक्षालय हो । त्यहाँ नेपालसहितका थुप्रै विदेशी विद्यार्थीहरू अध्ययनरत छन् । विशेष गरी मधेश प्रदेशका विद्यार्थीहरूका लागि नजिकैको मधुवनी क्याम्पसमा इन्जिनियरिङ लगायतका कोर्सहरू किफायती शुल्कमा अध्ययन गर्न सकिने व्यवस्था रहेको जानकारी चौधरीले दिए ।

उनका अनुसार नेपाली विद्यार्थीका लागि मधुवनी क्याम्पसमा इन्जिनियरिङ अध्ययनको कुल खर्च साढे पाँच लाख भारतीय रुपैयाँ र नाशिक क्याम्पसमा साढे आठ लाख रुपैयाँ पर्नेछ । युनिभर्सिटीले स्नातकदेखि पीएचडी तहसम्मको अध्ययन सुविधा उपलब्ध गराउँदै आएको छ ।

संदिप युनिभर्सिटीले ‘कम खर्चमा गुणस्तरीय इन्जिनियर उत्पादन’ गर्ने लक्ष्यसहित नेपाली विद्यार्थीहरूका लागि विशेष सुविधा र सहयोगको व्यवस्था गरिरहेको बताइएको छ । चौधरीका अनुसार छात्रवृत्ति, परामर्श सेवा, आवास सुविधा र अभिभावकहरूसँग नियमित संवाद लगायतका माध्यमबाट विद्यार्थीहरूको सम्पूर्ण विकास सुनिश्चित गर्न युनिभर्सिटी प्रतिबद्ध छ ।

कार्यक्रममा सहभागी अभिभावक, शिक्षक तथा विद्यार्थीहरूले यस्ता सम्मान कार्यक्रमले विद्यार्थीहरूमा आत्मविश्वास बढाउने, प्रतिस्पर्धात्मक भावना जागृत गर्ने र उज्ज्वल भविष्य निर्माणमा सघाउ पुर्याउने बताए ।