जनकपुरधाम, ३ जेठ । मधेश प्रदेशका चिकित्सकहरूको साझा संगठन राष्ट्रिय चिकित्सक संघ, नेपालको पहिलो प्रादेशिक अधिवेशन शनिबार जनकपुरधाममा सम्पन्न भएको छ ।

अधिवेशनबाट सर्वसम्मत रूपमा डा. नौसाद हकको अध्यक्षतामा नयाँ १६ सदस्यीय प्रदेश कार्यसमिति चयन गरिएको छ । संघको यो नयाँ कार्यसमिति प्रदेशस्तरीय चिकित्सकहरूको हकहितका लागि सशक्त नेतृत्वका रूपमा अघि बढ्ने अपेक्षा गरिएको छ ।

अधिवेशनले प्रदेशभरिका सरकारी तथा निजी क्षेत्रमा कार्यरत चिकित्सकहरूको व्यापक सहभागितामार्फत प्रतिनिधित्व सुनिश्चित गर्दै नयाँ समितिको घोषणा गरेको हो । नवगठित कार्यसमिति मधेश प्रदेशको स्वास्थ्य सेवा प्रणाली सुधार, चिकित्सकहरूको पेशागत हक अधिकार संरक्षण, क्षमता विकास र सेवा पहुँचमा समावेशिता ल्याउने उद्देश्यसहित कार्ययोजना निर्माणमा जुट्ने बताइएको छ ।

नयाँ कार्यसमितिमा अध्यक्ष डा. नौसाद हक, उपाध्यक्षहरू डा. गंगारमा खर्ग र डा. कृष्णा महर्जन, सचिव डा. आशिक झा, उपसचिव डा. अवधेश मण्डल, महिला उपसचिव डा. रमिता यादव, कोषाध्यक्षमा डा. दीपक चौरसिया चयन भएका छन् ।

त्यस्तै, सदस्यहरूमा डा. विशाल शर्मा, डा. अमरेस यादव, डा. फणिन्द्र अधिकारी, डा. विमल कुमार यादव, डा. केसर बहादुर साह, डा. राजेस नायक, डा. शैलेन्द्र साह, डा. राम प्रताप साह, डा. गंगा प्रसाद यादव, डा. मोस्तिकिम मन्सुर, डा. ओम प्रकाश कुसवाहा, डा. सुरेन्द्र यादव, डा. वेद प्रसाद कुसवाहा, डा. उमेश कुमार कुसवाहा, डा. सुधिर यादव, डा. विरेन्द्र साह, डा. पंकज साह र डा. एराज खान रहेका छन् ।

अध्यक्ष डा. नौसाद हकले अधिवेशनपश्चात पत्रकारसँग कुरा गर्दै संघले स्वास्थ्य सेवा प्रणाली सुधारमा सरकारसँग समन्वय गर्दै चिकित्सकहरूको भूमिका अझ प्रभावकारी बनाउने योजना बनाएको जानकारी दिए । उनले भने, ‘हामी अब मधेश प्रदेशका चिकित्सकहरूको हक अधिकारको संरक्षण मात्र नभई स्वास्थ्य क्षेत्रमा गुणस्तरीय सेवा सुनिश्चित गर्ने दिशामा ठोस कार्यक्रमहरू अघि ल्याउनेछौं ।’

सचिव डा. आशिक झाले संघको प्राथमिकतामा स्वास्थ्यमा पहुँच, गुणस्तर, सुरक्षित कार्य वातावरण, प्रशिक्षणको अवसर र चिकित्सकहरूको पेशागत गरिमा राखिएको बताए । महिला उपसचिव डा. रमिता यादवले महिला चिकित्सकहरूको नेतृत्व विकास र भोगिरहेको पेशागत चुनौतीहरू समाधानतर्फ विशेष कार्यक्रम ल्याइने प्रतिबद्धता जनाइन् ।

अधिवेशनले मधेश प्रदेशमा कार्यरत चिकित्सकहरूलाई एउटै छातामुनि संगठित गर्दै समन्वित र नीतिनिर्माणमैत्री संगठन निर्माणतर्फको ठूलो फड्को मारेको छ । यससँगै संघले प्रदेशभरका स्वास्थ्य संस्थासँग सहकार्य गर्दै नीति निर्माण, सुझाव र अनुगमनमा समेत भूमिका खेल्ने बताइएको छ ।