जनकपुरधाम, १ जेठ । तेस्रो जनकपुरधाम मेयर कप ट्वान्टी–२० क्रिकेट प्रतियोगिता अन्तिम चरणमा पुगेको छ । बिहीबार सम्पन्न दुई रोचक र प्रतिस्पर्धात्मक सेमिफाइनल खेलपछि अब नेपाली टोली बारा र भारतीय टोली लखनऊ उपाधिका लागि आमनेसामने हुने भएका छन् । शुक्रबार जनकपुरधामको रामजानकी अन्तर्राष्ट्रिय बहुउद्देश्यीय रंगशालामा यी दुई बलिया टिमबीच उपाधिका लागि भिडन्त हुनेछ ।

पहिलो सेमिफाइनल खेलमा भारतीय टोली लखनऊले नेपालको महोत्तरीलाई १ सय ३० रनको लक्ष्य पछ्याउँदै ९ विकेट गुमाएर १९ ओभर ५ बलमै रोमाञ्चक जित हात पारेको हो । लखनऊको बलिङ आक्रमणमा मनिष सिंह प्रमुख हतियार बने । उनले ४ ओभरमा २६ रन खर्चेर ३ महत्वपूर्ण विकेट लिँदै म्यान अफ द म्याचको उपाधि जिते । शिव सिंहले २ विकेट र आशमित मिश्रा तथा शैलेन्द्र सिंहले समान १/१ विकेट लिएर महोत्तरीलाई सस्तैमा रोक्न सहयोग गरे । महोत्तरीका लागि ओपनर रविकुमार सिंहले ४९ बलमा ५६ रन बनाए । लक्ष्य पछ्याउने क्रममा लखनऊका सुधिर सिंहले २६ रन, पृथुल मेहताले २३ रन, समित पाठकले १३ रन, र अंकित सिंह तथा सुभम यादवले समान १२/१२ रन बनाएर टिमलाई फाइनलमा पुर्याए । महोत्तरीका नितेशकुमार यादव र अकाश मण्डलले समान २ विकेट लिए ।

दोस्रो सेमिफाइनल खेलमा नेपालकै बारा जिल्ला टोलीले भारतको मुजफ्फरपुरलाई २५ रनले हराउँदै फाइनल यात्रा तय गर्यो । टस हारेर पहिले ब्याटिङ गरेको बाराले निर्धारित २० ओभरमा ५ विकेट गुमाएर २१३ रनको विशाल योगफल तयार पार्यो । राष्ट्रिय टिमका अलराउन्डर आदिल अन्सारीले निलम्बन फुकुवापछि पहिलो प्रतियोगितामै धमाकेदार कमब्याक गरे । उनले ४३ बलमा ८० रन बनाउँदै ७ चौका र ५ छक्का प्रहार गरे । साथमा रवि साहले ५० रन, विवेक यादवले १३ बलमा आक्रामक ३६ रन, र कप्तान पवन सराफले १८ रन बनाए ।

बलिङतर्फ मुजफ्फरपुरका मोहित कुमारले २ विकेट लिए भने आदित्य कुमार, हर्ष कुमार र सचिन कुमार सिंहले एक/एक विकेट लिए । २१३ रनको लक्ष्य पछ्याउने क्रममा मुजफ्फरपुरका ब्याटरले संघर्ष गरे पनि १९ ओभर ४ बलमै १८८ रनमा समेटिए । इमरान नाजिरले २४ बलमा ४० रन, मोहमद तौफिकले ३४ रन, अलोक कुमारले २७ रन र रवि शर्मा तथा मोहित कुमारले २०/२० रन बनाए । तर, बाराका विवेक यादवले ३.४ ओभरमा २९ रन खर्चेर ५ विकेट लिँदै विपक्षी ब्याटिङ लाइन ध्वस्त पारे । उनी म्यान अफ द म्याच घोषित भए ।

अब प्रतियोगिताको फाइनलमा नेपाली टोली बारा र भारतीय टोली लखनऊबीच प्रतिस्पर्धा हुनेछ । बाराले यसअघि पर्सा, दिल्ली र मुजफ्फरपुरलाई हराउँदै फाइनलको यात्रा तय गरेको हो भने लखनऊले रौतहट, सिरहा र महोत्तरीलाई पराजित गर्दै उपाधि नजिक पुगेको हो ।

जनकपुरधामको रामजानकी अन्तर्राष्ट्रिय रंगशाला यो वर्ष पनि मेयर कपको सफल आयोजना स्थल बनेको छ । आयोजक जनकपुरधाम उपमहानगरपालिकाका अनुसार उपाधि भिडन्तका लागि सम्पूर्ण तयारी पूरा भइसकेको छ ।