जनकपुरधाम, ३० वैशाख । तेस्रो जनकपुरधाम मेयर कप टी–२० क्रिकेट प्रतियोगिता रोमाञ्चक बन्दै जाँदा मंगलबारका खेलमा भारतको लखनउ र नेपालको पर्सा जिल्ला टिमले शानदार जित निकाल्दै सेमिफाइनल प्रवेशका सम्भावना बलियो बनाएका छन् । जनकपुरधामस्थित निर्माणाधीन रामजानकी बहुउद्देश्यीय अन्तर्राष्ट्रिय रंगशालामा जारी प्रतियोगिताले उत्साहजनक गति लिएको छ ।

पहिलो खेलमा भारतको उत्तर प्रदेश राज्य अन्तर्गतको लखनउ टिमले नेपाली जिल्ला टिम सिरहामाथि ९ विकेटको शानदार जित हात पारेको छ । सिरहाले टस हारेर पहिले ब्याटिङ गर्दै निर्धारित २० ओभरमा सबै विकेट गुमाउँदै १२२ रन बनाएको थियो ।

जवाफमा लखनउ टिमको बलियो ब्याटिङ लाइनअपले मात्र १४.२ ओभरमै लक्ष्य पूरा गर्दै सहज जित निकाले । लखनउका प्रिथुल मेहताले अविजित ५१ बलमा ६२ रन बनाउँदा सोमेन मोहेन्टीले ३० बलमा ५० रनको आक्रामक पारी खेले । सुमित पाठक भने ५ रनमा दिनेश अधिकारीको बलमा आउट भए । लखनउको जितले लिग तालिकामा शीर्ष स्थानका लागि बलियो दाबेदारको रूपमा उभ्याएको छ ।

दोस्रो खेलमा भारतको दिल्ली टिमले अत्यन्त निराशाजनक प्रदर्शन गर्दै टस जितेर पहिले ब्याटिङ गर्दा जम्मा ६० रनमा सीमित भयो । दिल्लीका कुनै पनि ब्याट्सम्यानले जमेर खेल्न सकेनन् । पर्साका बलरहरू लगातार दबाब सिर्जना गर्न सफल भए ।

पर्साले जवाफी ब्याटिङमा ६.४ ओभरमै २ विकेटको क्षतिमा लक्ष्य भेट्टाउँदै ८ विकेटको सहज जित दर्ता गर्यो । बलिङ र ब्याटिङ दुवै विभागमा पर्साको प्रदर्शन सन्तुलित र अनुशासित देखियो । यसले टिमलाई आगामी चरणतर्फ अगाडि बढ्ने सम्भावनामा ठूलो टेवा दिएको छ ।

जनकपुरधाम उपमहानगरपालिकाको आयोजना र नेपाल क्रिकेट संघ (क्यान) को सहकार्यमा भइरहेको प्रतियोगितामा मधेश प्रदेशका ८ वटा जिल्ला टिम र भारतका ४ वटा टिम गरी कुल १२ टिम सहभागी छन् । प्रतियोगिता लिग चरणमा भइरहेको छ, जहाँ प्रत्येक टिमले अरू टिमहरूसँग प्रतिस्पर्धा गर्दैछ ।
लिग चरणको अन्तिम खेल जेठ १ गते लखनउ र रौतहट तथा बारा र दिल्लीबीच हुनेछ । यी खेलहरूले सेमिफाइनल समीकरणलाई अन्तिम रूप दिनेछन् ।

जिल्ला क्रिकेट संघका सदस्य सरोजकुमार मिश्रका अनुसार प्रतियोगिताको विजेता टिमलाई २ लाख रुपैयाँ नगद र ट्रफी प्रदान गरिनेछ भने उपविजेता टिमले १ लाख २५ हजार रुपैयाँसहित ट्रफी प्राप्त गर्नेछ । प्रतियोगिता जेठ २ गतेसम्म सञ्चालन हुनेछ ।