जनकपुरधाम, २९ वैशाख । जनकपुरधामको रामजानकी अन्तर्राष्ट्रिय बहुउद्देश्यीय रंगशालामा जारी तेस्रो जनकपुरधाम मेयर क्रिकेट कपमा मंगलबार दुई खेलमा सिरहा र बाराले शानदार जित हासिल गरेका छन् ।

पहिलो खेलमा सिरहाले रौतहटलाई ३६ रनले पराजित गर्दै शानदार जित आफ्नो नाम गरेको हो । टस जितेर ब्याटिङ थालेको सिरहा टिमले निर्धारित २० ओभरमा ९ विकेट गुमाएर १ सय १० रन बनाएको थियो । सिरहाका लागि अशोक पौडेलले २४ रन, कृषि अएरले २४ रन र दिपेश दासले १९ रन बनाए । बलिङतर्फ, आशिष बैठाले चार ओभरमा २० रन खर्चेर चार विकेट, मोहन घिमरेले १५ रन खर्चेर तीन विकेट तथा सनी साहले २५ रन खर्चेर दुई विकेट लिए ।

रौतहटले जवाफमा १७ ओभर ५ बलमा ७३ रन मात्र बनाउन सक्यो । सिरहालाई ३६ रनको जित दिलायो । रनबिर यादवले २० र राजेश यादवले २१ रन बनाएका थिए । बलिङमा, आशिष बैठाले ४ ओभरमा २० रन र चार विकेट लिए भने अन्य बलरहरूले पनि प्रभावशाली प्रदर्शन गरे ।

दोस्रो खेलमा भने बाराले पर्सालाई १ सय १२ रनको फराकिलो अन्तरले हराउँदै दोस्रो जित हासिल गर्यो । टस जितेर ब्याटिङ थालेको बाराले निर्धारित २० ओभरमा ८ विकेट गुमाएर १७५ रनको ठूलो लक्ष्य प्रस्तुत गर्यो । विवेक यादवले ३० बलमा ६३ रनको आक्रामक पारी खेले भने अरनिको यादव र निखिल सिंहले क्रमशः २५ र १८ रनको योगदान दिए ।

पर्साको बलिङमा रञ्जित कुमारले तीन विकेट लिँदै उत्कृष्ट प्रदर्शन गरे भने वासिम मन्सुरी र अनुज चौहानले दुई–दुई विकेट लिए । जवाफमा पर्साले १७ ओभर ३ बलमा सबै विकेट गुमाएर मात्र ६२ रन बनाउन सक्यो । राजा मन्सुरी र सफवान अलिले केही संघर्ष गरे पनि अन्य ब्याटरहरूले दोहोरो अंकमा रन बनाउन सकेनन् ।

बाराका बलरहरू भुलावन सहनीले ४ ओभरमा ८ रन खर्चेर ४ विकेट लिएको प्रदर्शनले खेललाई अझ रोमाञ्चक बनाएको थियो । पवन सर्राफ र कमल गुप्ताले पनि प्रभावशाली बलिङ प्रदर्शन गरे ।