काठमाडौं, २३ वैशाख । लोकतान्त्रिक समाजवादी पार्टी नेपाल (लोसपा) ले पार्टीको केन्द्रीय महाधिवेशन २०८२ सालको साउन मसान्तभित्र सम्पन्न गर्ने निर्णय गरेको छ ।

पार्टी अध्यक्ष महन्थ ठाकुरद्वारा जारी विज्ञप्ति अनुसार यसअघि २०८२ वैशाख २६ गते महाधिवेशन गर्ने निर्णय भए पनि केही जिल्लाहरूमा आवश्यक संरचनागत तयारी अपूरा भएकाले महाधिवेशनको मिति पुनः संशोधन गरी साउन मसान्तभित्र सम्पन्न गर्ने निर्णय गरिएको हो ।

२०८१ भदौ १९ र २० गते काठमाडौंमा सम्पन्न लोसपा केन्द्रीय पदाधिकारी समितिको बैठकले वैशाख २६ गते महाधिवेशन गर्ने निर्णय गरेअनुसार वडा, पालिका, जिल्ला र प्रदेश अधिवेशन तथा सदस्यता नवीकरणका प्रक्रिया अघि बढाइएको थियो । तर, पछिल्लो समीक्षामा केही जिल्लामा पालिकास्तरका अधिवेशनहरू अझै सम्पन्न नभएको देखिएको छ ।

त्यसैले वैशाख २१ गते बसेको शीर्ष नेताहरूको बैठक र केन्द्रीय सचिवालयको निर्णय अनुसार आवश्यक गृहकार्य पूरा गर्न केन्द्रीय महाधिवेशनको मिति साउन मसान्तसम्म सारिएको लोसपाले जानकारी दिएको हो । लोसपाले महाधिवेशनलाई पार्टीको सांगठनिक रूपान्तरण र भावी राजनीतिक दिशाको मोडचित्र तय गर्ने अवसरका रूपमा लिएको बताएको छ ।

महाधिवेशनमा पार्टीको नयाँ विधान संशोधन, नेतृत्व चयन, संगठन विस्तार र भावी रणनीतिक दस्तावेज निर्माण गरिने तयारी छ । ‘महाधिवेशन केवल समय–तालिकाको अभ्यास नभई पार्टीलाई नयाँ राजनीतिक युगमा प्रवेश गराउने मोमेंट हो,’ लोसपाका एक वरिष्ठ नेताको भनाइ थियो ।

लोसपाका संगठन विभाग अनुसार अब बाँकी रहेका पालिकास्तरका अधिवेशनहरू असार महिनाभित्र सम्पन्न गरिनेछ । त्यसैगरी वडा–पालिका, जिल्ला र प्रदेशस्तरका कार्यसमिति पुनर्गठन गरी केन्द्रीय महाधिवेशन प्रतिनिधिहरूको चयन गरिनेछ । साथै, सदस्यता नवीकरण कार्यलाई समेत अबको एक महिनाभित्र टुंग्याउने लक्ष्य राखिएको छ ।

अध्यक्ष महन्थ ठाकुरले जारी गरेको विज्ञप्तिमा सर्वस्तरमा संगठनात्मक अनुशासन, कार्ययोजना अनुसारको जिम्मेवारी र एकताको भावना साथ महाधिवेशनको तयारी गर्न निर्देशन दिएका छन् । उनले भनेका छन्, ‘महाधिवेशन हामी सबैको साझा जिम्मेवारी हो । एकता, पारदर्शिता र लोकतान्त्रिक प्रक्रियामा अडिग रहेर अघि बढ्न जरुरी छ ।’