बारा, १८ वैशाख । बाराको फेटा गाउँपालिकामा बिहीबार दिउँसो भएको सवारी दुर्घटनामा परी १३ वर्षीय बालक समर पण्डितको ज्यान गएको छ ।

दुर्घटनामा बालकका साथै दुईजना घाइते भएका छन् । दुर्घटनापछि पिकअप भ्यानका चालक फरार भएका छन् भने प्रहरीको प्रारम्भिक अनुसन्धानमा लापरवाहीको संकेत देखिएको छ ।

प्रहरीका अनुसार विश्रामपुर गाउँपालिका–९ इटियाहीका सुनिल पण्डितका छोरा समर पण्डितको घटनास्थलमै मृत्यु भएको हो। समर अटोमा सवार थिए ।

बारा प्रहरी प्रवक्ता डीएसपी विजयराज पण्डितले जानकारी दिएअनुसार फेटा गाउँपालिका–७ गम्हरिया टोलमा मटिअर्वातर्फ गइरहेको बागमती प्रदेश ०१–०३० च १४२१ नम्बरको पिकअप भ्यानले विपरीत दिशाबाट आइरहेको ना २ ह ४८८९ नम्बरको अटोलाई ठक्कर दिएको हो ।

दुर्घटनामा घाइते भएकी चितवन निवासी निलम हजारा र उनका छोरा आदित्य हजारालाई गम्भीर अवस्थामा उपचारका लागि वीरगंजस्थित नेशनल मेडिकल कलेज, शिक्षण अस्पतालमा भर्ना गरिएको प्रहरीले जनाएको छ ।

ठक्कर दिएर चालक भने फरार भएको र उनको खोजी भइरहेको बारा प्रहरी कार्यालयले जनाएको छ । अटो चालक र दुबै सवारीसाधनलाई प्रहरीले नियन्त्रणमा लिएको छ ।

स्थानीयले सडकमा तीव्रगतिमा गुड्ने सवारीहरू नियन्त्रणबिहीन ढंगले चलाइने गरेको गुनासो गर्दै सडक सुरक्षामा राज्यको ध्यान केन्द्रित गर्न माग गरेका छन् ।