जनकपुरधाम, १४ वैशाख । धनुषाको धनुषाधाम नगरपालिका–६ स्थित मालटोलचोकमा आइतबार बिहान दुई ट्रक आपसमा ठोक्किँदा भीषण आगलागी भएको छ ।

दुर्घटनामा दुबै ट्रकमा आगो सल्किएको र एक ट्रक पूर्ण रूपमा नष्ट भएको धनुषा प्रहरीले जानकारी दिएको छ ।

सिरहाबाट ढल्केवरतर्फ गइरहेको ना ६ ख ३४६३ नम्बरको ट्रक र विपरीत दिशाबाट आइरहेको मधेश प्रदेश–०२ ००१ ख ०७१५ नम्बरको ट्रक एकआपसमा ठोक्किएका थिए । ठक्करपछि दुबै ट्रकका ट्याङ्कीहरू फुटेर तेल फैलिएको थियो । त्यसपछि आगो सल्किएको थियो ।

धनुषा प्रहरीका प्रवक्ता डीएसपी वरुणबहादुर सिंहका अनुसार ना ६ ख ३४६३ नम्बरको ट्रक पूर्ण रूपमा जलेर नष्ट भएको छ । आगलागीको कारण ठूलो क्षति भएको र ट्रकका चालकहरू घाइते भएका छन् ।

दुर्घटनामा घाइते भएका चालकहरू सर्लाही जिल्लाका रोशन कौशल कार्की (लालबन्दी नगरपालिका–१५) र मुकेशकुमार झा (मौलापुर) रहेका छन् ।

दुबै घाइते चालकलाई उपचारका लागि जनकपुरधामस्थित एपोलो अस्पतालमा राखिएको छ । उनीहरूको अवस्था अहिले खतरा बाहिर रहेको प्रहरीले जनाएको छ ।

प्रहरीको प्रारम्भिक अनुसन्धान अनुसार गलत साइडबाट प्रवेश गरेपछि यो दुर्घटना भएको थियो । ट्रकको ठक्करपछि तेल फैलिएको र आगलागी सुरु भएको विवरण प्राप्त भएको छ । घटनाबारे विस्तृत अनुसन्धान जारी रहेको प्रहरीले जनाएको छ ।