जनकपुरधाम, १० वैशाख । जनकपुरधाम उपमहानगरपालिका वडा नं. १० का वडाध्यक्ष मिथलेश कर्ण बुधबार साँझ मोटरसाइकलमा यात्रा गरिरहेका क्रममा जिपको ठक्करबाट गम्भीर घाइते भएका छन् ।

प्राप्त प्रारम्भिक विवरणअनुसार कर्णलाई मोटरसाइकलमा सवार अवस्थामा तीव्र गतिमा आइरहेको जिपले ठक्कर दिँदा गम्भीर चोट लागेको हो ।

घटनापछि स्थानीयहरूले तत्कालै उनलाई उद्धार गरी प्रादेशिक अस्पताल जनकपुरमा भर्ना गराएका थिए । अस्पताल स्रोतका अनुसार कर्णको अवस्था गम्भीर भए पनि खतरामुक्त बनाउन चिकित्सकहरूको टोली निरन्तर उपचारमा जुटिरहेको छ ।

दुर्घटनापछि नेपाली कांग्रेसका वरिष्ठ नेता तथा पूर्वउपप्रधानमन्त्री विमलेन्द्र निधि अस्पताल पुगेका थिए । उनले अस्पतालमा पुगेर वडाध्यक्ष कर्णको स्वास्थ्य अवस्थाबारे चिकित्सकहरूसँग जानकारी लिएका थिए । नेता निधिले कर्णको शीघ्र स्वास्थ्य लाभको कामना गरे ।

वडाध्यक्ष कर्ण नेपाली कांग्रेसका स्थानीय तहका सक्रिय नेता हुन् । हाल घटनाको विस्तृत विवरण र दुर्घटनाको कारण खुलाउन प्रहरी अनुसन्धानमा जुटेको जनाएको छ ।

यस विषयमा थप जानकारी आउन बाँकी रहेको छ ।