जनकपुरधाम, ९ वैशाख । नेपाल कराते महासंघ मधेश प्रदेशको संयोजनमा काठमाडौंमा बैशाख १० देखि १३ गतेसम्म सञ्चालन हुने ‘प्रथम शेर बहादुर देउवा राष्ट्रिय कराते प्रतियोगिता २०८२’ मा मधेश प्रदेशबाट ३० जना खेलाडी तथा अफिसियलहरू सहभागी भएका छन् ।

महासंघको प्रदेश कार्यालयद्वारा जारी सूचनामा उल्लेख भएअनुसार चैत २४ गते बर्दिवासमा सम्पन्न छनौट प्रतियोगिता पश्चात चयन भएका खेलाडीहरूको अन्तिम सूची सार्वजनिक गरिएको थियो । छनौटमा उत्कृष्ट प्रदर्शन गरेका विभिन्न जिल्लाका कराते खेलाडीहरू काठमाडौं हुने प्रतियोगितामा प्रदेशको प्रतिनिधित्व गरेका छन् ।

धनुषा, महोत्तरी, सिरहा, बारा, सर्लाही लगायत जिल्लाबाट छनोट भएका पुरुष तथा महिला खेलाडीहरू विभिन्न तौल समूहमा प्रतिस्पर्धा गर्नेछन् । पुरुषतर्फ दिलीप पटेल (५० केजी), आदित्य कालिकोटे (५५ केजी), सरोज पासवान (६० केजी), होमबहादुर थापा (६७ केजी), समुयल मग्राती (७५ केजी), मणिकुमार (८४ केजी), रितिक थिङ (५५ केजी) लगायत खेलाडी छन् ।

महिलातर्फ पोर्सिया चौधरी (४५ केजी), रितिका थिङ (५५ केजी), विपिका थापा (६८ केजी), अनु रैका (६८ केजी) लगायतका खेलाडीले सहभागिता जनाएका छन् । साथै, टिम काता तथा एकल काता विधामा पनि प्रतियोगीहरूले प्रतिस्पर्धा गर्नेछन् ।

खेलाडीहरूको साथमा प्रशिक्षक कसम कुमार लामा, चित्रबहादुर पुलामी, व्यवस्थापक देव लामा तथा निर्णायकहरू उमेश गुरुङ, फुलकुमारी हेन्जन, हेम कुमार लामा, रितिक लामा, रितेश तामाङ, राजेश गुप्ता लगायत रहेका छन् ।

नेपाल कराते महासंघ मधेश प्रदेशका अध्यक्ष रामचन्द्र ठाकुरका अनुसार यो प्रतियोगिता खेलाडीहरूको क्षमता अभिवृद्धि तथा राष्ट्रिय स्तरको अनुभव सँगाल्ने अवसरको रूपमा रहेको छ । उनले भने, ‘हाम्रो टोलीले राम्रो प्रदर्शन गर्ने विश्वास लिएको छ । यो प्रतियोगिता भविष्यका लागि खेलाडीहरूलाई अझ मजबुत बनाउनेछ ।’