बारा, ५ वैशाख । बाराको पथलैया–निजगढ सडकखण्डमा शुक्रबार दिउँसो भएको एक सवारी दुर्घटनामा दुई जनाले ज्यान गुमाएका छन् । पूर्व–पश्चिम लोकमार्गको १३ किलो नजिकै भएको उक्त दुर्घटनामा कार र ट्रिपर आपसमा ठोक्किँदा कारमा सवार दुई जनाको मृत्यु भएको हो ।

मृतक मध्ये एक जनाको पहिचान सर्लाहीको बरथवा नगरपालिका–१५ हजरियाका ४६ वर्षीय नारायणहरि शर्माको रूपमा गरिएको जिल्ला प्रहरी कार्यालय बाराले जनाएको छ । अर्का मृतक कार चालकको सनाखत भने अहिलेसम्म हुन सकेको छैन ।

बाराको जीतपुरसिमरा उपमहानगरपालिका–१६ स्थित भूईपुल नजिक ट्रिपर र कार एकआपसमा ठोक्किँदा दुर्घटना भएको हो । प्रहरीका अनुसार निजगढबाट पथलैयातर्फ गइरहेको प्र २–०३–००१ ख ०६०७ नम्बरको ट्रिपर र पथलैयाबाट निजगढतर्फ जाँदै गरेको बा ०१–०२५ च ५०७६ नम्बरको कार बीच ठक्कर लागेको थियो ।

दुर्घटनामा कार पूर्ण रूपमा क्षतिग्रस्त भएको र गम्भीर घाइते अवस्थामै उद्धार गरिएका दुवै जनाको उपचारका क्रममा मृत्यु भएको प्रहरीले जनाएको छ । कार चालकको पहिचान खुल्न बाँकी रहेको र उनको सनाखतका लागि प्रक्रिया अघि बढाइएको जनाइएको छ ।

प्रहरीका अनुसार दुर्घटनापछि ट्रिपर चालक घटनास्थलबाट फरार भएका छन् । उनको खोजी तीव्र पारिएको र ट्रिपर नियन्त्रणमा लिएर थप अनुसन्धान अगाडि बढाइएको इलाका प्रहरी कार्यालय सिमराले जानकारी दिएको छ ।

घटनापछि प्रहरीले दुर्घटनाग्रस्त सवारी साधनलाई हटाएर सडक खुला गरेको छ । प्रहरीले दुर्घटनाको थप अनुसन्धान भइरहेको र चालकको खोजीमा सहयोग गर्न सर्वसाधारणलाई अनुरोध गरेको छ ।