सप्तरी, ४ वैशाख । सप्तरीको राजविराजमा जारी मधेश प्रिमियर लिग (एमपीएल) सिजन ३ अन्तर्गत तेस्रो दिनको खेलमा जनकपुर सनराइजर्स र मिथिला वारियर्स विजयी बनेका छन् । दुवै टोलीले उत्कृष्ट प्रदर्शन गर्दै आफ्ना प्रतिस्पर्धीलाई पराजित गरेपछि प्रतियोगिता थप प्रतिस्पर्धात्मक बनेको छ ।

तेस्रो दिनको पहिलो खेल जनकपुर सनराइजर्स र छिन्नमस्ता रुपनी मधेश राइडर्सबीच भएको थियो । टस जितेर पहिले ब्याटिङ गरेका मधेश राइडर्सले २० ओभरमा ११३ रन बनाएका थिए । त्यसको जवाफमा जनकपुर सनराइजर्सले १५.३ ओभरमै ८ विकेट गुमाउँदै लक्ष्य पूरा गर्दै २ विकेटको रोमाञ्चक जित हात पार्यो ।

जनकपुरको तर्फबाट विशाल कुमार पटेलले सर्वाधिक ३२ रन बनाए भने अखिल श्रवण २४, आदिल खान १३, विशाल सुस्लिङ र मयन यादवले समान १२–१२ रनको योगदान गरे । बलिङतर्फ मधेश राइडर्सका दिवान पुन, दिनेश अधिकारी र अभिषेक कार्कीले २–२ विकेट लिए भने हेमन्त धामीले १ विकेट लिए ।

तेस्रो दिनको दोस्रो खेलमा मिथिला वारियर्सले काठमाडौं रोयल्सलाई १४ रनले पराजित गर्दै प्रतियोगितामा विजयी शुरुवात गरेको छ । पहिले ब्याटिङ गर्दै मिथिला वारियर्सले १५९ रनको चुनौतीपूर्ण लक्ष्य दिएको थियो ।

काठमाडौं रोयल्सले जवाफमा २० ओभरमा ९ विकेट गुमाएर १४४ रन मात्र बनाउन सक्यो । टोलीका तर्फबाट अर्जुन साउद ३३, अमित श्रेष्ठ र रूपेश कुमार सिंहले समान २४ रन र केशव साउदले १४ रनको योगदान गरे । अन्य ब्याट्सम्यानले खास प्रदर्शन गर्न सकेनन् ।

मिथिला वारियर्सका बलरहरूमा दीपेन्द्र सिंह ऐरी स्टार बने । उनले ४ विकेट लिए । साथै नन्दन यादव, बसन्त रेग्मी, बसिर अहमद र कुशल भुर्तेलले समान १–१ विकेट लिएर विरोधी टोलीलाई दबाबमा राखे ।

एमपीएलको चौथो दिनको खेल तालिका अनुसार पहिलो खेल कोशी दुहबी क्यापिटल र सप्तरी बलान बिहुल सुपर किंग्सबीच हुनेछ ।

त्यसपछि दोस्रो खेलमा जनकपुर सनराइजर्स र मिथिला वारियर्सबीच प्रतिस्पर्धा हुनेछ । दुवै टोलीले जितका साथ चौथो दिन प्रवेश गरेकाले निकै रोमाञ्चक हुने अनुमान गरिएको छ ।