सर्लाही, २९ चैत । सर्लाहीको ईश्वरपुर नगरपालिका–१३ स्थित श्रीनगरमा दुर्घटनामा परी १७ वर्षीया किशोरी अन्जली कुमारी महतोको घटनास्थलमै मृत्यु भएको छ । हरिपुर्वा नगरपालिका–५ की स्थायी बासिन्दा अन्जली श्रीनगरमा बस्दै आएकी थिइन् । शुक्रबार बिहान साईकलमा विद्यालय जाँदै गर्दा ट्रकको ठक्करले उनको मृत्यु भएको हो ।

दुर्घटना मिर्चैया बजार नजिकै हरिपुर्वा नगरपालिका–९ मा भएको हो । ना.५ ख ३८५८ नम्बरको ट्रक मिर्चैयातर्फ आउँदै गर्दा साईकलमा गइरहेकी अन्जलीलाई ठक्कर दिएको थियो ।

स्थानीयवासीका अनुसार सडक छेउमा अवैध रूपमा राखिएका निर्माण सामग्री—ढुङ्गा, काठ, गिट्टी, बालुवा, गोबर गोइठा आदिले सडक साँघुरो बनाइदिएको छ । यस्तो अव्यवस्थित अतिक्रमणका कारण सडकमा सवारी चलाउन निकै कठिन भएको र दुर्घटना हुनु स्वाभाविकजस्तै बनेको उनीहरूको भनाइ छ ।

घटनापछि ट्रक र चालकलाई नियन्त्रणमा लिइएको छ । जिल्ला ट्राफिक कार्यालयका अनुसार दुर्घटनाबारे थप अनुसन्धान भइरहेको छ ।