काठमाडौं, २३ चैत । दिल्ली क्यापिटल्सले इन्डियन प्रिमियर लिग (आईपीएल) २०२५ मा आफ्नो अपराजित यात्रा कायम राख्दै तेस्रो जित हात पारेको छ । शनिबार भएको रोमाञ्चक खेलमा दिल्लीले चेन्नई सुपर किङ्सलाई २५ रनले पराजित गर्दै अंकतालिकाको शीर्षस्थानमा उक्लिएको हो ।

टस जितेर पहिले ब्याटिङ गरेको दिल्ली क्यापिटल्सले निर्धारित २० ओभरमा ६ विकेटको क्षतिमा १८३ रनको चुनौतीपूर्ण योगफल तयार पारेको थियो । दिल्लीका लागि ओपनर केएल राहुलले उत्कृष्ट प्रदर्शन गर्दै ७७ रनको सशक्त पारी खेले । ५१ बलमा खेलिएको उनको पारीमा ६ चौका र ३ छक्का सामेल थिए । अभिषेक पोरेलले ३३ रनको योगदान गरे भने ट्रिस्टन स्टब्स २४ रनमा अविजित रहे ।

चेन्नई सुपर किङ्सका बलरहरूमध्ये खलील अहमदले सबैभन्दा प्रभावशाली प्रदर्शन गरे । उनले ४ ओभरमा २५ रन खर्चिएर २ विकेट लिएका थिए । त्यसैगरी रविन्द्र जडेजा, नूर अहमद र मथिसा पथिरानाले समान १/१ विकेट हात पारे ।

१८४ रनको लक्ष्य लिएर मैदानमा ओर्लिएको चेन्नईले निर्धारित २० ओभरमा ५ विकेटको क्षतिमा १५८ रन मात्र बनाउन सक्यो । चेन्नईका विजय शंकरले संघर्षपूर्ण अर्धशतक प्रहार गरे । उनले ६९ रनमा अविजित रहँदा कप्तान एमएस धोनीले २५ रन बनाएर इनिङ समाप्त गरे । तर, दुवैको प्रयास टोलीलाई जितसम्म पु¥याउन पर्याप्त भएन ।

दिल्लीका बलरहरूले सन्तुलित प्रदर्शन गरे । विपराज निगमले ४ ओभरमा २७ रन खर्चेर २ विकेट लिए । मिचेल स्टार्क, मुकेश कुमार र कुलदीप यादवले समान १/१ विकेट झारे ।

यो जितसँगै दिल्ली क्यापिटल्सले ३ खेलबाट पूर्ण ६ अंक जोड्दै तालिकाको शीर्ष स्थानमा कब्जा जमाएको छ । यदि अब हुने खेलमा पञ्जाब किङ्स विजयी भएमा उनीहरू फेरि शीर्षस्थानमा फर्कन सक्छन् ।

अर्कोतर्फ, लगातार हारले चेन्नई सुपर किङ्सको अवस्था जटिल बन्दै गएको छ । चार खेलबाट केवल २ अंक मात्र जोडेको चेन्नई हाल आठौं स्थानमा सीमित छ ।

दिल्लीको यो जितले आईपीएलको उपाधि दौडमा उनीहरूलाई बलियो दाबेदार बनाएको छ भने चेन्नईले अब बाँकी खेलमा उत्कृष्ट प्रदर्शन गर्नैपर्ने दबाबमा परेको छ ।