जनकपुरधाम, १८ चैत । नेपाली कांग्रेसका नेता विमलेन्द्र निधिले पूर्वराजा ज्ञानेन्द्रको गतिविधि संविधान विपरीत रहेको बताएका छन् ।

सोमबार जनकपुरधाम वडा नं ११ मा आयोजित एक कार्यक्रममा बोल्दै नेता निधिले गणतन्त्र, संघीयता र लोकतन्त्रको पक्षमा यो देशका नागरिक नै मालिक रहेको र राजाको समयमा सार्वभौम सत्ता राजाको हातमा रहेको भए पनि अहिले लोकतन्त्रमा त्यसको अधिकार जनतामा सरेको बताए ।

नेता निधिले भने, ‘पूर्वराजा ज्ञानेन्द्रलाई पूर्वराजा भन्नु भन्दा अन्तिम राजा भन्नु उपयुक्त छ ।‘ उनले यससँगै नेपालमा पुनः राजतन्त्र कहिल्यै नफर्किने दाबीसमेत गरे । उनले राजा ज्ञानेन्द्रको गतिविधि संविधानको विपरीत रहेको भन्दै देशको जनता अब आफ्ना अधिकारको लागि सजग र सशक्त बनेको कुरा औँल्याए ।

नेपालमा राजतन्त्रको अन्त्यपछि भएको परिवर्तनलाई स्मरण गर्दै नेता निधिले भने, ‘राजतन्त्रको समयमा नेपाली जनताले हरेक संकटमा राजालाई साथ दिएका थिए । तर, त्यसको बदला राजाले जनतालाई धोका मात्र दिएका छन् ।’

कार्यक्रममा वडा नं ११ का १२० जना जेष्ठ नागरिक र १८ जना अपाङ्गलाई सम्मान गरिएको थियो । त्यस्तै वडावासीका लागि निशुल्क आँखाको शिविरमा मोतियाबिन्दको उपचार पनि गरिएको थियो । वडाध्यक्ष अर्जुन चौधरीले आगामी केही दिनभित्रै वडाभरिका कक्षा ८ देखि कक्षा १० का विद्यार्थीहरूको लागि निशुल्क कोचिङ कक्षा सञ्चालन गर्ने घोषणा गरे ।

चौधरीले वडामा १५ जना महिलालाई ब्यूटी पार्लरको तालिमको व्यवस्था गरिएको जानकारी पनि दिएका थिए ।