जनकपुरधाममा सरकारको समर्थनमा एमालेको मोटरसाइकल र्याली
जनकपुरधाम, १८ चैत । नेकपा एमालेले जनकपुरधाममा गणतन्त्रको रक्षा र सरकारको समर्थनमा मोटरसाइकल र्याली आयोजना गरेको छ ।
यो र्याली एमालेको सांगठानिक गतिविधिलाई सशक्त बनाउन, जनताबीच पार्टीको सन्देश पुर्याउन र गणतन्त्रको विरोध गर्ने शक्तिहरूलाई चुनौती दिन लक्षित गरिएको थियो ।
र्यालीमा जनकपुरधामका सबै वडा कमिटीका सदस्यहरू, पार्टीका युवा कार्यकर्ता, स्थानीय नेता तथा समर्थकहरू सहभागी भएका थिए । उनीहरू मोटरसाइकलमा झण्डा फहराउँदै एमालेको नारा लगाउँदै र लोकतान्त्रिक व्यवस्थाको समर्थन जनाउँदै शहरका मुख्य सडकहरूमा परिक्रमा गरेका थिए ।
एमाले उमाशंकर अडगरियाले गणतन्त्रको रक्षा गर्ने विषयमा पार्टी दृढ रहेको बताए । उनले भने, ‘गणतन्त्रको रक्षा गर्नु भनेको जनताको अधिकारको रक्षा गर्नु हो । एमाले सधैं लोकतन्त्रको पक्षमा संघर्षरत रहन्छ ।’
उनले जनकपुरधाममा आयोजित यो प्रदर्शनले गणतन्त्रलाई संस्थागत गर्दै आगामी राजनीतिक परिदृश्यमा एमालेको उपस्थितिलाई अझ बलियो बनाउने बताए ।
मोटरसाइकल र्यालीले सरकारको समर्थन मात्र नभई जनकपुरधाम र सम्पूर्ण मधेश क्षेत्रमा एमालेको जनसम्पर्क विस्तार गर्ने लक्ष्य राखेको थियो । नेता अडगरियाका अनुसार र्यालीले पार्टीलाई आगामी निर्वाचनका लागि मजबुत बनाउन महत्वपूर्ण भूमिका खेल्नेछ ।
‘यो र्याली राजतन्त्रको पुनस्र्थापनाको हल्लालाई खारेज गर्दै सरकारको पक्षमा स्पष्ट सन्देश दिने उद्देश्यले गरिएको हो । हामी सरकारसँग छौं । संविधान र गणतन्त्रको रक्षा गर्नेछौं,’ उनले थपे ।
र्यालीपछि एमाले नेताहरूले जनताको माझमा पुगेर पार्टीको एजेन्डा प्रचार गर्ने, संगठनलाई सुदृढ पार्ने र गणतन्त्रको विरोध गर्ने शक्तिहरूलाई परास्त गर्ने रणनीति बनाएको बताएका छन् । एमालेका अनुसार यो केवल एउटा कार्यक्रम मात्र नभई देशभर गणतन्त्रको रक्षा र पार्टी सुदृढीकरणका लागि यस्ता गतिविधिहरू निरन्तर गरिनेछ ।
उनीहरूका अनुसार यस प्रदर्शनले आगामी निर्वाचनमा पार्टीलाई बलियो बनाउने र सरकारलाई थप मजबुत गर्नेछ ।
