काठमाडौं, १७ चैत । चैत १५ गते शुक्रबार काठमाडौंको तीनकुने क्षेत्रमा राष्ट्र, राष्ट्रियता, धर्म, संस्कृति र नागरिक बचाउ महाअभियान नेपालद्वारा आयोजित शान्तिपूर्ण प्रदर्शन हिंसात्मक रुप लिएको घटनामा प्रहरीको गम्भीर ध्यानाकर्षण भएको छ ।

जिल्ला प्रहरी परिसर काठमाडौंका सूचना अधिकारी प्रहरी उपरीक्षक अपील राज बोहराले घटनाको गम्भीर अनुसन्धान भइरहेको जानकारी दिएका छन् । उनले उक्त घटनामा विभिन्न सामाजिक सञ्जालमार्फत भ्रामक सूचना प्रवाह भइरहेको भन्दै गम्भीर चिन्ता व्यक्त गरेका छन् ।

घटनासँग सम्बन्धित अनुसन्धान अझै जारी रहेको र मृतकको पोष्टमार्टम समेत सम्पन्न नभएको अवस्थामा सामाजिक सञ्जालमा ‘चैत १५ गते मारिएका पत्रकार सुरेश रजकको शरिरमा गोली भेटिएको छ !’ भन्ने भ्रामक र गलत सूचना फैलिएको प्रहरीको भनाइ छ । प्रहरीका अनुसार यसले जनमानसमा भ्रम र नकारात्मक सन्देश प्रवाह गरिरहेको छ ।

प्रहरीले यस्ता भ्रामक सूचनालाई प्राथमिकताका साथ निगरानी गर्दै कानुनी कारबाहीको दायरामा ल्याउने स्पष्ट संकेत गरेको छ । गलत र भ्रामक समाचार सम्प्रेषण गर्ने व्यक्ति तथा संस्थाहरुलाई प्रचलित कानुनअनुसार कारबाही गर्ने चेतावनी दिइएको छ ।

वास्तविकता नबुझी गरिएको यस्तो कार्यले दोषीलाई कानुनी प्रक्रियामा ल्याउन बाधा पुग्न सक्छ । जनमानसलाई शान्ति र संयमित भएर सत्य समाचारमा मात्र विश्वास गर्न पनि प्रहरीले आग्रह गरेको छ ।

सम्बन्धित निकायले सत्य तथ्य बाहिर ल्याउन पूर्ण अनुसन्धान गरिरहेको र चाँडै वास्तविक दोषीलाई सार्वजनिक गर्ने प्रतिवद्धता व्यक्त गरेको छ ।

आयोजकका तर्फबाट संयोजक नवराज सुवेदी र प्रमुख अगुवा दुर्गा प्रसाईको नेतृत्वमा भएको प्रदर्शनमा सहभागीहरुले विभिन्न स्थानमा तोडफोड, आगजनी लगायतका हिंसात्मक गतिविधि गरेका थिए । यस क्रममा तीनकुनेस्थित एक घरमा आगजनी हुँदा घरभित्र रहेका एभिन्यूज टेलिभिजनका पत्रकार सुरेश रजकको मृत्यु भएको थियो ।