राजविराज, १७ चैत । राजविराजस्थित मधेश कृषि विश्वविद्यालयका प्राध्यापक र कर्मचारीहरूले आइतबारदेखि पुनः आन्दोलन सुरु गरेका छन् । उनीहरूले भदौ महिनादेखि तलब नपाएको भन्दै घरपरिवार चलाउन समस्या भइरहेको बताएका छन् ।

यसअघि फागुन १ गते पनि प्राध्यापक र कर्मचारीहरूले तलब नपाएको भन्दै विश्वविद्यालयको प्रशासनिक भवनमा ताला लगाएर विरोध जनाएका थिए । हालसम्म पनि तलब समस्या समाधान नभएपछि उनीहरूले पुनः आन्दोलनको सुरुवात गरेका छन् ।

विश्वविद्यालयका कुलपतिसमेत रहेका मधेश प्रदेशका मुख्यमन्त्री सतिशकुमार सिंहको उपस्थितिमा आयोजित सर्वपक्षीय भेलाबाट कर्मचारीलाई तलब दिने प्रक्रिया अपनाउने निर्णय भएपनि तलबको मुद्दा अझै समाधान भएको छैन । यस अघि फागुन २० मा भएको विश्वविद्यालयको सिनेट बैठकले उपकुलपति डा. वैद्यनाथ महतो र रजिस्ट्रार श्रीभगवान ठाकुरलाई पदमुक्त गर्ने निर्णय गरेपछि यो विवाद थप चर्किएको हो ।

सर्वोच्च अदालतको अल्पकालीन आदेशपछि पदमुक्त नगर्ने निर्णय गरिएपनि कर्मचारीहरूले अझै तलब पाउन सकेका छैनन् । विश्वविद्यालयका रजिस्ट्रार भगवान ठाकुरका अनुसार नीति र कार्यक्रम पास नगरेको कारणले कर्मचारीलाई तलब दिन सकिएको छैन ।

प्राध्यापक र कर्मचारीहरूको आन्दोलनका कारण विश्वविद्यालयका विद्यार्थीहरूको पढाइ प्रभावित हुने खतरा उत्पन्न भएको छ । आन्दोलनको प्रभावले कक्षाको सञ्चालनमा अवरोध ल्याउने सम्भावना देखिएको छ ।

समस्याको दीर्घकालीन समाधानका लागि विश्वविद्यालय प्रशासन, कर्मचारी र सरकारबीच थप छलफल र वार्ता आवश्यक देखिएको छ ।