काठमाडौं, १७ चैत । पूर्वराजा ज्ञानेन्द्र शाहले काठमाडौं महानगरपालिकाले पठाएको ७ लाख ९३ हजारको जरिवाना पत्र बुझ्न अस्वीकार गरेका छन् ।

गत शुक्रबार तीनकुनेमा भएको आन्दोलनको क्रममा उत्पन्न भएको फोहोर र तोडफोडको मूल्याङ्कन गर्दै महानगरपालिकाले उक्त जरिवाना तोकेको थियो । त्यसलाई निर्मल निवासले अस्वीकार गरेपछि महानगरपालिकाले कानुनी प्रक्रियाबाट जरिवाना असुल गर्ने तयारी गरिरहेको छ ।

महानगरपालिकाको टोली जरिवाना पत्र लिएर निर्मल निवास पुगेपछि त्यहाँबाट पत्र नबुझी फिर्ता पठाइएको थियो । नगर प्रहरी प्रमुख राजुनाथ पाण्डेले उक्त टोलीलाई निर्मल निवासले गेटमै रोकिदिएको र पत्र बुझ्न नमानेपछि टोली यत्तिकै फर्कनुपरेको जानकारी दिए ।

काठमाडौं महानगरपालिकाका कानुनी सल्लाहकार ओम प्रकाश अर्यालले पत्र बुझ्न नमाने पनि वैकल्पिक कानुनी प्रक्रिया अवलम्बन गरिने बताए । उनका अनुसार पत्रिकामा सूचना निकाल्न सकिने, हुलाकमार्फत चिठी पठाउन सकिने र आर्थिक कार्यविधि तथा वित्तीय उत्तरदायित्व ऐन २०७६ अनुसार केन्द्रीय तहसिलको कार्यालयमार्फत लगत कायम गरेर जरिवाना असुल उपर गर्न सकिने व्यवस्था छ ।

महानगरले कानुनी प्रक्रिया सुरु गर्न तयार रहेको र जरिवानाको रकम फिर्ता नलिएमा कानुनी रुपमा अन्य उपायहरू अपनाउने तयारी गरेको छ ।