जनकपुरधाम, १६ चैत । तराई–मधेश लोकतान्त्रिक पार्टीले चैत १५ गते भएको हिंसात्मक घटनाहरूको कडा निन्दा गर्दै पुनरुत्थानवादी तत्वहरूको दुष्प्रयासलाई असफल पार्न जनताको एकता र संघर्षको आवश्यकता रहेको जनाएको छ ।

तमलोपाले देशको संघीय लोकतान्त्रिक गणतन्त्रको रक्षा गर्दै यी घटनाहरूको न्यायिक छानबिन र दोषीहरूलाई कठघरामा ल्याउन माग गरेको हो ।

पार्टीका केन्द्रीय अध्यक्ष वृषेशचन्द्र लालले जारी गरेको विज्ञप्तिमा भनेका छन्, ‘नेपालको जनताको लामो संघर्ष र बलिदानपछि प्राप्त संघीय लोकतान्त्रिक गणतन्त्रलाई चुनौती दिने यस्ता घटनाहरूको विरोध गर्दै हामी पुनरुत्थानवादीहरूको हिंसा र अराजकताका कडा विरोध गर्दछौं ।’

उनले उक्त घटनामा पत्रकार सुरेश रजकको हत्यालाई एक भयावह कृत्यको रूपमा चित्रित गर्दै पत्रकारको शोकमा परिवारप्रति समवेदना व्यक्त गरेका छन् । ‘स्व. सुरेश रजकको चीर शान्तिको काम गर्दै वहाँको परिवारप्रति हाम्रो हार्दिक समवेदना छ,’ उनले भने ।

तराई–मधेश लोकतान्त्रिक पार्टीले संघीय लोकतान्त्रिक गणतन्त्रको मर्म र यसका सिद्धान्तहरूको दृढ बचाव गर्दै राज्यका अंगहरूमा समानुपातिक समावेशी भागीदारीको सुनिश्चितताको माग गरेको छ । पार्टीका अनुसार सरकारका विभिन्न अंगहरूमा देखिएका बेथिति, भ्रष्टाचार र नातावाद–कृपावाद–समूहवादले जनतामा उत्पन्न गरेको निराशालाई पुनरुत्थानवादी र प्रतिक्रान्तिवादी शक्तिहरूले आफ्नो स्वार्थको लागि उपयोग गर्न खोजिरहेका छन् ।

अध्यक्ष लालले थपे, ‘समाजका प्रत्येक क्षेत्रमा समानुपातिक प्रतिनिधित्व सुनिश्चित गर्नु नै संघीय लोकतान्त्रिक गणतन्त्रको बलियो आधार हो । यस्ता घटनाहरूको न्यायिक छानबिन गरि दोषीलाई दण्डित गर्नु अति आवश्यक छ । जनताको अधिकारको रक्षा गर्न न्यायिक प्रणालीलाई सक्रिय बनाउनु पर्छ ।’

पार्टीले जनाए अनुसार यस्ता हिंसात्मक घटनाहरूमा पुनरुत्थानवादी अराजकतावादी शक्तिहरूका शिकार बनेका पत्रकार सुरेश रजकले आफ्नो कर्तव्य निभाउँदै ज्यान गुमाउनु परेको घटना सबैको लागि स्तब्धकारी रहेको छ । ‘यस्ता घटनाहरूमा जनताको अधिकार र स्वतन्त्रताको रक्षा गर्न सबैले एकजुट भएर काम गर्नुपर्ने बेला आएको छ,’ अध्यक्ष लालले बताए ।

पार्टीले पनि शासनसत्तामा रहेका समूहलाई समयमै सचेत गराउन र विधिको शासनको दृढ पालना गर्न आग्रह गरेको छ । ‘हामी सबै प्रकारका कदाचारको अन्त्यको लागि प्रतिबद्ध छौं र विधिको शासनको सन्देश सबै जनतासम्म पुर्याउनुपर्ने छ,’ उनले भने ।