काठमाडौं, १६ चैत । नेपाल पत्रकार महासंघको शनिबार बसेको आकस्मिक केन्द्रीय समितिको बैठकले पत्रकार सुरेश रजकको योजनाबद्ध हत्या र सञ्चारगृह तथा पत्रकारमाथि भएको आक्रमण तथा आगजनीको विरोधमा देशव्यापी आन्दोलनका थप कार्यक्रम घोषणा गरेको छ ।

बैठकले सञ्चारमाध्यममा गरिएको क्षति, घाइते पत्रकार र हराएका सञ्चार सामग्रीको विवरण संकलन गर्न र आन्दोलनलाई थप सशक्त बनाउन विभिन्न कार्यक्रम तय गरेको हो ।

महासंघले आइतबार सबै सञ्चारकर्मीलाई कार्यस्थलमा कालोपट्टी बाँधेर विरोध जनाउन आह्वान गरेको छ भने सोमबार केन्द्रीय समिति, प्रदेश समिति र शाखाहरू मार्फत नेपाल सरकारलाई ज्ञापनपत्र बुझाउने निर्णय गरेको छ । मंगलबार सरोकारवाला संगठनहरूसँग छलफल गरी आगामी आन्दोलनका कार्यक्रमलाई थप सशक्त बनाउने निर्णय गरिएको छ ।

पत्रकार सुरेश रजकको हत्या सम्बन्धी सत्यतथ्य पत्ता लगाउन महासंघले उपाध्यक्ष उमिदप्रसाद बागचन्दको नेतृत्वमा पाँच सदस्यीय समिति गठन गरेको छ । उक्त समितिमा सचिवहरू रमेश खतिवडा, सोनी शर्मा, प्रकाश धौलाकोटी र वैकुण्ठराज पराजुली सदस्य रहेका छन् । समितिले रजक सम्बद्ध सञ्चारगृह र परिवारसँग छलफल गरी प्रतिवेदन तयार पार्नेछ ।

शनिबार बसेको आकस्मिक बैठकले विभिन्न मिडिया हाउसमा गरिएको आगजनी र तोडफोडका साथै सञ्चारकर्मीमाथि भएको आक्रमणको कडा विरोध गर्दै घटनामा संलग्न व्यक्तिहरूलाई शीघ्र पक्राउ गर्न माग गरेको छ । महासंघले पत्रकारको हत्या र सञ्चारमाध्यममाथिको आक्रमणलाई प्रेस स्वतन्त्रता र लोकतन्त्रमाथिको गम्भीर चुनौतीको रूपमा लिएको छ ।

यसैबीच, महासंघको आह्वानमा आज देशभर विभिन्न स्थानमा पत्रकारहरूले विरोध प्रदर्शन गरेका छन् । हिजो राजावादीको नाममा भएको आन्दोलनमा सहभागी अराजक समूहले लगाएको आगोमा जलेर पत्रकार सुरेश रजकको मृत्यु भएको थियो भने अन्य पत्रकार घाइते भएका थिए । यस क्रममा विभिन्न सञ्चारगृहमा आगजनी, तोडफोड तथा सञ्चार सामग्री हराउने घटनाहरू पनि भएका थिए ।

महासंघले यस्ता हिंसात्मक घटनाको निन्दा गर्दै आगामी दिनमा यस्ता घटनालाई रोक्न सरकारले ठोस कदम चाल्नुपर्नेमा जोड दिएको छ ।