काठमाडौं, १५ चैत । शुक्रबार काठमाडौंको तीनकुने क्षेत्रमा पूर्वराजाका समर्थकहरूले गरेको प्रदर्शनको क्रममा संविधान प्रदत्त विचार र अभिव्यक्तिको स्वतन्त्रता र बिना हातहतियार शान्तिपूर्वक भेला हुने स्वतन्त्रताको गम्भीर उल्लंघन भएको गृह मन्त्रालयले जनाएको छ ।

मन्त्रालयले प्रदर्शनको क्रममा भएको हिंसात्मक गतिविधिको गम्भीर भर्त्सना गर्दै यसलाई गैरकानूनी र अमानवीय कार्य भनेको छ ।

मन्त्रालयका सहसचिव छवि रिजालले एक विज्ञप्ति जारी गर्दै भनेका छन्, ‘प्रदर्शनको क्रममा व्यक्तिका निजी सम्पत्ति, अस्पताल, सञ्चार गृह, राजनीतिक दलका कार्यालय, व्यापारिक केन्द्र र यातायातका साधनहरूमाथि भएको तोडफोड र आगजनीका घटनाहरू घोर भर्त्सनायोग्य र गैरकानूनी छन् ।’

सहसचिव रिजालले प्रदर्शनका आयोजकलाई यी घटनाका लागि पूर्ण रूपमा जिम्मेवार ठहर गर्दै भने, ‘संविधानले सबै वर्ग, जाति, भाषा, लिङ्ग, क्षेत्र र धार्मिक अधिकारको संरक्षण गर्दै लोकतान्त्रिक शासन व्यवस्थाको उच्चतम उपयोग गर्ने मार्ग प्रशस्त गरेको छ । यस्ता हिंसात्मक घटनाहरूले संविधान र लोकतन्त्रको अपमान गर्ने मात्र होइन, समाजको शान्ति र सद्भावलाई पनि खतरामा पार्ने काम गर्छ ।’

मन्त्रालयले हिंसात्मक र अराजनीतिक गतिविधिहरूबाट समाजको भलाई हुन नसक्ने र नागरिकको अधिकारलाई क्षति पुग्ने स्पष्ट पारेको छ । साथै, सरकारले यी अमानवीय र गैरकानूनी गतिविधिमा संलग्न कुनै पनि व्यक्तिलाई कानूनी दायरामा ल्याउने प्रतिवद्धता जनाएको छ ।

सहसचिव रिजालले आम नागरिकलाई अपिल गर्दै भने, ‘हामी सबैलाई कानूनको उल्लंघन नगरी शान्तिपूर्ण र संवैधानिक अधिकारको प्रयोग गर्न आग्रह गर्दछौं । यस प्रकारका हिंसात्मक कार्यमा संलग्न नहुन र विधिको शासनको पालना गर्न सरकार दृढ प्रतिबद्ध छ ।’