जनकपुरधाम, १५ चैत । मधेश प्रदेशका भौतिक पूर्वाधार विकास मन्त्री सरोज कुमार यादवले पूर्वमन्त्रीहरूले गर्दै नगरेको कामको नाममा खाएको रकम असुल्नका लागि नयाँ कदम चालेको जानकारी दिएका छन् । शुक्रबार जनकपुरधाममा नेपाल दूरसञ्चार राष्ट्रिय कर्मचारी संगठनको १२औं प्रादेशिक अधिवेशन उद्घाटन सत्रमा बोल्दै उनले यस्तो बताएका हुन् ।

मन्त्री यादवले भने, ‘पूर्व अर्थमन्त्रीहरूले योजनामा उठाएको रकम र गर्दै नगरेको कामको नाममा खाएको रकमको असुली प्रक्रिया अहिले अघि बढेको छ । यसका लागि हामीले छानबिन समितिको सट्टा न्यायिक समिति गठनको प्रस्ताव राखेका छौं ।’ उनले भने, ‘अब हामी कुनै पनि प्रकारको अनियमितता र भ्रष्टाचारलाई सहन गर्न तयार छैनौं र सबै काम पारदर्शी बनाउन चाहन्छौं ।’

मन्त्री यादवले भने, ‘पूर्व मुख्यमन्त्रीले सुराकी भत्तामा तीन लाख रुपैयाँ बुझेको र यो रकम फिर्ता गरेको कुरा सार्वजनिक छ । अब अन्य मन्त्रीहरूको विरुद्ध पनि यस्ता रकम असुल्नको लागि पत्र तयार पारिएको छ ।’ उनले थपे, ‘सम्बन्धित व्यक्तिहरूले फिर्ता नगरेको रकम सरकारले असुल्न कदम चाल्ने छ ।’

पूर्व मन्त्रीहरूसँग असुल्नुपर्ने रकमका बारेमा उनले थपे, ‘हामीले तैपनि योजना बेच्नको आरोपहरू अस्वीकार गरेका छौं र सबै प्रक्रियामा पारदर्शिता राख्ने प्रतिवद्धता लिएका छौं ।’

संसदीय क्षेत्र विकास कोषका सन्दर्भमा मन्त्री यादवले १ हजार ९७ योजनाहरूको विवरण प्रस्तुत गरे । उनले भने, ‘हामीले सबै योजनाहरू पारदर्शी तरिकाले कार्यान्वयन गर्ने कुरा सुनिश्चित गरेका छौं । कुनै पनि योजनामा खरिदबिक्री र अन्य अनियमितताहरूको जाँच हुनेछ र सम्बन्धित पक्षलाई पत्र नदिने प्रतिबद्धता राखेका छौं ।’

मन्त्री यादवले विपक्षी दलको आरोपको जवाफ दिँदै भने, ‘हामीले गर्दै नगरेका योजनाहरूको नाममा आरोप लगाउनुका कारण भने राजनीतिक प्रहार हो । यस्ता आरोपहरू जाँच र छानबिन प्रक्रिया मार्फत मात्रै सही तरिकाले समाधान गर्न सकिन्छ ।’